شبت النار

[الصمت الثائر]

عذاً لاحبتي عن غيابي واليكم بهذه المتواضعة


يالله اني طلبتك تغفر الزلّه"="عالم (ن) ظاهر الدنيا وخافيها

يا مجيب لدعا عبدك وغافر لّه"=" ترحم اللي عذابه من لياليها

هاضني هم منه الروح معتلّه"="ساكن القلب واحلامي معنّيها

شبت النار وابقت بالحشا ملّه"="من حطب خاطري والروح تاويها

واختلف وقتنا يالمعتلي يالله"="صار ذيبه كما شاته مساويها

آه من هالمسا والدرب ما دلّه"="أسري الليل والنجمة اخاويها

عقب ما الذيب يعقد حبل ويحلّه"="صارت الشاه حره في خطاويها

بين خوف وحنين وعزه وذلّه"="ما معي من حياتي كود ماضيها

يا زمان (ن) غدرني دقه وجلّه"="وش بقى من حياتي لجل تشقيها

البخت مال عني وابتعد كلّه"="والجروح العميقه من يداويها

ما عرفت الطرب حتى على حلّه"="والسحابه تمر ومزنها فيها

والقدر لا غدر ما حي يقدر لّه"="حكمة الله ولا نقدر نعاديها

ما لي الا القصيد آلوذ في ظلّه"="واسكن ابيات عشت ابني قوافيها

واتمنى الزمن علّه ويا علّه"="يرحم الروح من عتمة لياليها