ماني من اللي يركعن للأقاويل

[ترانيم المطر]

يا

ليل

يا

ليل

السهر


والتعاليل








يالليل يا ليل السهر والتعاليل =هم يجي فيكم وهمٍ تجلا

وهمٍ يراعيني وانا أراعي سهيل =وسهيل غاب وهم قلبي تعلا

وسريت مع همي ليالٍ مقابيل =أطالع همومي وفيها أتحـــلا

وجلست أقلب بالصور والمراسيل =كني غريبٍ عن دياره مجلا

حدوه ربعه عن طريقه على الميل =في ليل مظلم وسط سيفٍ يسلا

وفي غفلتن من ساعةٍ باخر الليل = جاني هنايه يوم عني تخلا

في غفلةٍ فيها صحي فاتر الحيل = جاني هنايه يوم حظي تعلا

وشكيت له ماصابني من تهاويل =شكيت لين الهم روّح ووّلا

وشكيت له دمع انسكب بالمناديل = وشكيت همٍ للمعاليق تلا

يا حظ ليه تغيب ليه البهاذيل =تركتني والهم فيني تسلا

مالي جدا يا كود جر المواويل =لو شفتني كني خميس المعلا


قال اسمعي يا غاليه عندنا حيل =ماعاد أكررها حشا ثم كلا

والله لذّلل كل الاصعاب تذْليل = مهما حصل ياعاليه ماتخلا

لو تطلبي يا عاليه فطرن حيل =ولو تطلبي كوكب مجره تدلا

قلت اسمع علومي ومن غير تطويل = ماعدت اصدق كل حكين يشلا

عطني براهينك ولا تنقص الكيل = ودر النياق الشعل ماهي مجلا

أخاف من جِهّيّل كدْشِنْ مهابيل = يحللون الهرج ناسٍ مبلا

ويعدلون بكيفهم فيه تعديل = ويلبسونه طوق وردن وفلا

قبل أنطق الجمله لها الف تحليل = أراجع الكلمه قبل لا تملا

وأضلل الناقص من الحرف تضليل =ومن يتبع الغرّات يصبح مخلا

و ماني من اللي يركعن للأقاويل =أنا ركوعي للولي فالمصلا

واقدر الوافي ولا أحاول أعيل =ومن عال ماله غير سيفن يسلا