الوافيه في بنات اليوم معدومه..!

[زيد راجح]

هذه القصيده كانت رد على الشاعر الكبير/محمد بن دغش الهاجري

حيث نشر قصيده موجهه لي في صفحه الأفق التي كان يشرف عليها زميلنا الرائع /خضير البراق . عندما كان يعد الصفحه في جريدة اليوم والتي ورد فيها هذا البيت

أبيه يسهر معي متكدرٍ نومه===ويراقب النجمه اللي كنت اراقبها

وقصيده محمد أجمل بكثير من قصيدتي ولكن لم أجدها وسوف أبحث عنها لامتاعكم بها
أن شاء الله.




يالوحةٍ في جبين ((الأفق)) مرسومه=مخطوطةٍ بالذهب..من ذوق كاتبها
فيها عن الحب معلومه ومعلومه=وافكار رسّامها الماهر مرتّبها
لقيتها في عيون الناس مضمومه=وانا احسب اني عن الانظار حاجبها
جتني تحث الخطى..والنفس مهمومه=اتسابق الريح..مسبلةٍ ذوايبها
واسكنتها في سويداء القلب محشومه=من قدر اهلها مقدّرها..وهايبها
واصبحت ادوّر لها من جنسها (تومه)=وامسيت ماغير امشّطها واطيّبها
درّة (محمد) عن الزلاّت معصومه=مصيونة العرض..والحسن امتلبّبها
زفرات نفسٍ من اللوعات مكلومه=فرقى المواليف لايعها ومذهبها
عين الوفيّ من لذيذ النوم محرومه=تطلع له الشمس وهمومه يحسّبها
الله يعينه..وقع في حب مريومه=وأدمت له الجرح..جعل الله يعذّبها
تقول في العرف..ماللحب ديمومه=وايامك البيض ياما اسرع تقلّبها
تظنها كلمةٍ سهله ومهضومه=ماثمّنتها..ولاتحسب عواقبها
كم قلت عن غدر حواء..مير مقسومه=لو سمعني ماتشربك في مقالبها
الوافيه في بنات اليوم معدومه=لوتبتسم لك ترى الغدر امتشربها
تظلمك..وتعاتبك بدموع مظلومه=وتروح ضمن الضحايا من سبايبها
يامحمد ابن دغش..دعواك محسومه=وان طعت شوري تنازل..لاتطالبها