الطبع شره وحني رأسي ما اريده

[ناصر عبيد الهواوي]

البارح اهوجس واسوي قصيدة=لعلها تخرج من الضيق وآروق
والصدر همه شب فيه الوقيدة=والنوم ابد ماكان يطري على الموق
واقول واهون واغير واعيده=لين انها زانت وشبت عن الطوق
وجت لي معانيها جزال وفريدة=واوضى الجبين ومظلم الشعر مفروق
ويوم انها صارت على مانريده=زوقتها واهديتها داعي الشوق
حيثه ذكي وارياه دايم سديدة=ولي يتضح من منطقه عالى الذوق
ياسعود خذ مني علومٍ وكيدة=فكر بها ربي يفكك من العوق
مرهون قلبي من هاكلحين بيده=وبكفه الآخر جمع كل معلوق
له صار ملك وصاحبه صار سيده=ماهوب يرفق به وماهوب معتوق
له كم سنه عايش بعيشة زهيدة=ومكبلٍ عند اريش العين موسوق
إن قلت اجي لك قال هاذي بعيدة=وإن قلت زرني قال تامرني ابوق
ولا زلت في بالوى ومنة نكيدة=مافيه حاضر دايم الوعد مفهوق
كني (كركتير)ورسوم بجريدة=اروح وارجع ليلي اهرف مع السوق
واصبحت احسد اهل القلوب البليدة=اللي خلية ماسعر جوفها الشوق
والطبع شره وحني راسي ما اريده=لو طاح جسمي ودي بهامتي فوق
ياسعود كان الوضع حله تجيده=شف حلٍ مناسب لوضعي يابن روق
عسى حياتك يالعتيبي سعيدة=وعساك دايم في مسرات ووفوق