يا طويل العمر ما عندك مكينه ...!!

[سلطان العطاوي]

يا طويل العمر ما عنـدك مكينـه=أمّ أسد سنجر ماهيب أمّ الفراشـه
يوم كفّك مـا تمـدّ ألا السمينـه=جيت كلّي خوف لا يسبق عكاشه
مانبـى الفكسـار والله لا يهينـه=يستريح الجيب في فيّـة قراشـه
والله إنّي مسلـمٍ مخلـص لدينـه=والحكومه والوطن في وسط جاشه
مسلمٍ مؤمـن وتغشـاه السكينـه=ينطح الإجحاف والظلم إببشاشـه
قلبه أصفى من دموعٍ وسط عينه=ما زعجها رغم غبنه وإندهاشـه
من زمانٍ فيـه للطيّـب ضغينـه=محتديه بحدّ سيف وحكـم باشـه
مخلبه جـارح وسطواتـه لعينـه=يودع الرجّـال بعظـامٍ هشاشـه
والذكي قدّامـه الفرصـه ثمينـه=يستمع لي بـس لايكثـر نقاشـه
كان ودّه يقضي أقصـاده ودينـه=يجلب السنجر ويبشـر بإنتعاشـه
أمّ أسـد ثنتيـن تطنـخ والدينـه=يصبح الباشه ويزهد في معاشـه



لصديقي الشاعر / سلطان بن حامد