قصيدة رثاء

[الخنساء]

ضاقت بي الدنيا الوسيعه والافلاك= وأصبحت أشوف إن الحقيقة خيالي



رحماك يا رب المخاليق رحماك =حزني عظيم ولا له أول وتالي



يا رب تقبل دعوة اللي ترجاك =يا الله يا والي على كل والي



اغفر لمن هو صار ضيفك وبحماك =انت الكريم اللي تجيب السؤالي



واجعل له الجنة برحمتك ورضاك =يا الله ياالمطلوب في كل حالي



عزاك يا راع المعاريف عزاك =والله قدرك طول الأيام غالي




وا حر قلبي كل ما مر ذكراك =كنه يصاليني من النار صالي



اكبر مصيبة يوم موتك وفرقاك =طاحت على راسي سوات الجبالي



حنا صبرنا واحتسبنا لما جاك =والمؤمن اللي يرتكي للثقالي



لو كان ما هي سنةٍ ما دفناك=لكن ما للعبد فيها مجالي



أمر عليك الله إلهك ومولاك =وحنا رضينا حكم رب الجلالي



والله يا سيد الرياجيل ما انساك =لمشي دروب أهل الوفا والكمالي



لمشي على نهجك على رسمة اخطاك =واصحابك أوفي برهم بالوصالي



لجلك وفي الطبع من طيب مجناك =وقفتك تعرف عند ضيم الليالي



تشهد على طيبك قرابتك واعداك =يا مزبن المضيوم منصى الرجالي



انت الكريم اللي على الطيب يمناك =ذخر الرجال مكرمين السبالي



الله يجعل جنة الخلد سكناك =مع النبي الهاشمي خير آلي

صح لسانك مليون ولايكفون
قصيدة جزلة ولاهنت
سلمت ودام حرفك