غرامك عروق القلب فيه يضخنه

[صنداح الزلامى]

انا البارحه حرم عليه لذيذ النوم = لذيذ الكرى عين عيوني يذوقنه
من اسباب منهو حط بين الظلوع سهوم = بنجل العيون اللي ذبحني حداهنه
سهوم الغرام اللي تشادي سهوم القوم = من النعس اللي مخطر(ن) من يصيبنه
سهمني سهومٍ بالنظر والاجل محتوم = من اعيونه اللي يرسل الموت فيهنه
عيونه عيون اللي ليامن كسربالحوم = طيور الحباري يسفك الدم منهنه
ولا ياوليفي صرت حاكم وانا محكوم = تحت حكمتك ياسيد الحور بالمنه
تحت حكمتك لاني بمعطى ولامحروم = يطول انتظاري وابلع الغيض واكنه
واكنه وراى عوج المحاني وانا مسموم = واقول الامل في زين الاوصاف واظنه
واظن الامل بوصالكم يالغضي معدوم = وقلبي غرامك داخل (ن) فيه ويدنه
تربع على عرش الظماير وقام يعوم = غرامك عروق القلب فيه يضخنه