الأم تربه والرجاجيل محصول

[الطائر المهاجر]

الأم تربه والرجاجيل محصول= والأب آلة صرف في كل الاحوال
في وقت فيه الأب مشدوه مذهول= مما يشوفه في عياله من افعال
لو جاء يعدل مايلٍ زاده ميول = فالنبت من ارضه شقيصٍ وفحال
هذي حنون وترضع الحب معسول= دينٍ وعقل بطيبة افعال وخصال
تنتج رجالٍ فعلهم يسبق القول = فيهم فخر للأب والعم والخال
وهذي جهنم بالقشر كنها الغول= اولادها والرجل زادتهم هبال
فالشوك يطلع شوك والطيب معزول= وش ترتجي من شجرةٍ كلها اعبال
وهذي انانيه على غير معقول = لو وصلت الخمسين بعقول جهال
لو كان تنسل كل عامين حاقول= ما عندها حس الأمومه بمثقال
يطلع لها طفل اتكالي ومغلول = مبرمج على تفكيرها فعل واقوال
ولا واجه الدنيا تقل شبه مشلول= يفشل فلا هو قادرٍ شيل الاحمال
ويرمي التهم من غير منطق ومدلول= ويمكن يسير بدرب يوصله الاغلال
فالأب مهما كان للخير مجبول= ومهما يربي كود يطلع له رجال
يطلع له اجسام بلا فكر وعقول= والطيّب اللي ما يدخله باشكال
امراض جتنا دون تطعيم مبذول= مع انفتاحٍ زادنا جهل واضلال
حبل التراخي زاد بالعرض والطول= فافسد حريم ولا توقف على عيال
وانفلت السبحه على عزف وطبول= وحق المره والطفل في كل موال
حتى غدينا ما نقلد ابو الهول= ولو كل عانا قال في احسن الحال
خذنا قشور الغرب والغرب معلول= واللي امر به ديننا صار باهمال
هذا نتاج الوقت في بعض محصول= والخافي اعظم من زمن ضيّع اجيال