بيني وبين سداح ..!!

[سلطان العطاوي]

صوت وصدى



الصوت

سلطان العطاوي





يالله يا كـاف البـلا يـا كافـي=يالواحد الوافي ما غيرك وافـي

تكتب لنا من كـل شـي خيـره=وتلطف بحال اللي عليه أخلافي

حنا عبيدك وانت نعـم المولـى=الطف وكن فـ/العون يا لطافـي

البارحه هاجوس فكـري عايـم=وازريت اجمع فكرتي واطيافـي

سرت بي اصداف الزمان الجاير=ولا سلمـت الا بعمـر لحافـي

كني مريض وكن حالي ضايـع=لو ان جسمي سالـم ومتعافـي

اضوي على فكره واخلي فكـره=واعود واتذكر أعلـوم اسلافـي

أعلوم عـود وافـيٍٍ فـي مـده=دايم وهو نعم الشراب الصافـي

يفرح به المضهود واللي صابه=من دورة ايام الامور اصنافـي

كريم سبلى مـا يخلـي جـاره=يتعب من أظروف الزمن ويخافي

أخذت منـه الأولـه والأخـرى=واوصاف ابويه عانها بأوصافي

ماهيب مدح الا فخـر بالنسبـه=وقفت وانا اللي علـى ميقافـي

يوم ان غيري غيرته أضنونـه=اسقيتها العـد القـراح الرافـي

هاذي حكاية يـوم يـا قاريهـا=وهاذي علوم الصيف يا صيافي

لو ان غبرات الزمـن منكوبـه=ولا تعرف اكتاف غيـر اكتافـي

لو أنها تعرف وجيـه الخيـره=ولو انها تفهم وفيهـا انصافـي

ما مات ابو فيصل زعيم الأمـه=وعاش (العقيد / معمر القذافي)







الصدى



للشاعر العلم / سداح











حيّ القصيد الوافي المستافي=اللي يشاف وميزته تنشافي

يلفت نظر كل الذوايق يمّه=مثل العلم في قمة المشرافي

نقد الذهب معروف للنقاده=والعمله الصعبه لها صرافي

لو شلة أفتح فمك ويرزقك الله=قامت تزايد بالزمان الهافي

الخيط بيط الله لا يكثر خيره=يسفي عليه من الذواري سافي

وسلطان يكرم قافه وميقافه=بدعه يهيّض بادعين القافي

خلاني أسوق الجمل وأغنّي=وأنا منوّل خاطري منلافي

جيته لو أنّه ما نوى يزهمني=بعد أستبان اللي في قلبي خافي

يفخر بعوده والفخر من حقه =شريف ساسه والجدود اشرافي

والله وسبع أنعام فيه وفيها =لو الشهاده جرحها نزافي

نادر حرار وسيرته محفوظه=ما حافها بالحنشله حوافي

يشكي هموم ٍ جاره الله منها =مفعولها مترامي الاطرافي

عدّ العلوم الثابته و علومه=ماهي علوم محمد الصحافي

اليوم حكام العرب مشبوهه=خلّت عروبتنا تسير خلافي

وقاداتها اللي ينفضون الشوشه=تنبض وتربض فالمراح الدافي

عز الله انه ما كذب في قوله=اللي يقول ان الرجال اصنافي

مات الزعيم اللي يصون الامّه=وعاش الزعيم الخاين الخوافي