والرزق لو هو بكيف العبد عـيــا بــه

[فواز الغسلان]

ياحمود طيب العرب ضاعت مواجـيـبـه=ولولا الـعــواجـه شـعور الناس ما شابه
تـركــت الاريـــام مـع بـسـمـة رعـــابـيـبــه=من شـفـتــهـا تـطــرق ابـهــامـه بـسـبــابـه
الــريــم تـجــري عـلــى روحي تــداريــبـــه=واشوف روحي عـن الخـفــرات ما تـابه
عـانـيـت عـمـري ورى كـذبـه وتـلـعـيـبـه=لاشـك مـوتـي بـعـيـن الــريـــم واهـدابــه
واسمع لـجـزل الـمـثـايل عـقـب تخـصـيبه=من شاعــرٍ يـنـظــم الـقـيـفــان مـنـسـابـه
ولو من بـغـى الـقـاف مايـبـلـش بـتـركيبه=مابـانـت اهـرام نـظــم الـشـعــر واربـابـه
لا هـاض جـاشـه غـدى يرسل مناديبه=يقـطـف نـوادر زهـور الـقـاف واطـيـابـه
واديــر فـكـري عـلــى مـوجــة دوالـيـبـه=وتـهـيـض تـشـبـه جـراد الـمـوج واسرابه
واشعار غـيـري بـوقـت الكـود مالي بـه=ولاني من اللي لـشـعـر الـنـاس كـسـابـه
اضـبـط مـعـانـي حروفي عـقــب ترتـيـبـه=وصارت تريح الخـفـوق وتـنـعش اعصابه
بأسباب وقــتٍ وطــانــا فـي مـصـاعـيبه=خلا الخـــلايـق تـذابــح تـقــل فـي غـــابه
بعض الاوادم تـقـول الـرزق من جـيـبه=ويظـن رزقـه يـجـي بـأطـراف مشـعـابـه
الـرزق عـصـفـورنـا يـصـبـح ويـمـسي بــه=وهو ما رمى الناس لاجل الرزق بأطوابه
الـنـــــاس كـلـــه مـثــل قــوة دغـــالــيـــبـه=والـرزق لـو هـو بكـيـف الـعـبـد عـيـا به
احــذر هـل الحـسد لو لانـت جوانـيـبه=تمـوت الافـعـى وسـم الـمـوت بانـيــابـه
ومن يجـحـد الطـيـب لاتامن مشاهيـبه=لو هو بوقـت الـفـراغـه يـفـتــل اشنابه
مثله دروب الـردى والـبـوق يحـري بــه=وحـفـظ الـجـمـايـل ظـهر بسباع وذيابه
واعراض الاجواد كف الهرج عن عيبه=وبـلــوى الاجاويد لاتضحك وتـبـلى بــه
واكبر من العـيب رجـلٍ قـام يمشي بــه=ولا خــاف سطوة عـقـوبـتـهـا ولا هـابـه
والعيب لو كنت قبل الـنـاس تـدري بـه=يـا حــظ رجــلٍ سـتــر غـيــره بجـلـبـابه
واخـتـار الاصـحـاب من ماكر مناجيبه=اللي بـلــوح الـمـراجـل طـقــة اطـنــابـه
والـعـمـر طـيـرٍ عـلـى عـالـي مـراكـيـبـه=ولا تفـجـعـك كـفـخته عن كف قضابه
الموت يجـذب هـل الـدنـيـا ويـومي بــه=واجيال الاجداد ناظر ويش سوى به
مايـرجـع الـعـمـر فـي صـبـغـه وتوضيبه=لـو تصـبــغ الـراس والخــديـن بخــضــابه
ودنـيــاك لو تاعـدك سارع بـتـكــذيـبــه=من قـبل ماتـطـعــن الخـفــاق بـحـرابــه
ومخـازن الـمـال لـو تـاخـذ وتعـطي بـه=يقطف ثـمـرها وريـثـك عقب ما طابه
وهـو سـالـمٍ من شقى جـمعه وتحسيبه=ولا ذاق ركض العرب بالسوق واتعابه
وياهون رجـلٍ قـعـد يـرجـي مـعازيـبـه=لاصـار مايـفـرس الـصـيــده بـمـخــلابـه
كان الـمـعـزب عـطـى صـافي مـشاريبه=ترجع وتشكي ظـمـى المـعلوق بأسبابه
لابــد ماتـشـــتـكـي جـــمـــرة لـواهـيـــبـه=لو عشت تشرب لذيذ الـوقت بأكوابه
وايــاك والـظــــلــــم لا تـقــرب كــلالــيــبـه=تـر بندق الـظـلــم مايخـطـيـك مضـرابـه
من سار في ظـلـم خـلــق الله وتعذيبه=يجـيـه يـومٍ ومـكـوى الـظـلم يـكــوى بـه
واحذر من الـعـفـن لا تشفق لـتـقـريـبـه=يـرمـيــك كـان اللـــيــالـي بــان مـصــلابـه
وكان انـت تـبـي الـعـيـال وزيـن تـعـريبه=اتـرك بـنــاتــه وعــرق الـبـخـل بـأنـســابه
من يـرجـي الـنـاس ماحـقـق مـطـالـيـبـه=لا صــار سـيـفــه يـنــام الـعـمـر بـجــرابه
ولا تـتـعـب الـنـفـس فـي كثرة مكاتـيـبه=ترجي عـطى اللي سـريـعٍ يـقـفل ابـوابـه
الادمـي لـو ظـهــر وسـط المــلا طيبه=وشفت العرب كلـهـا تـشـرب بمـحـلابه
لك يـوم يـاعـزوتـي تـسـمــع عــذاريـبـه=ولو جعت ترجي قشور العيش ماجابه
وعـلـيـك فـي واحـدٍ سـالـت مـرازيـبـه=ومن طق بـابـه بـتــال اللـيـل حـيـا بــه
خيره غـطـى الـداب فـي عـالي مراقيبه=ومن جود رب الملا ما شـح عـن دابه
اسـجـد لعـيـنـه الـيــا نــادت مـحـاريـبـه=ولازم حــروف الـهـدى والـنور بكتابه
هو خـالـق الـخـلـق والـلـي عـالـمٍ غيبه=ودعوات خـلـقـه بجـوف الليل ما خابه
بـانـت طـبــوع الاوادم عـقـب تجـريبه=ولا تنخدع في بـشـوت الـنـاس وثيابه
هـذي سـهـال الجــزيـره جــايــعٍ ذيـبــه=يشكي صـروف الـزمان بـراس مرقــابه
سرحان شاف الـزمـن بـانـت شواذيبه=والـذيــب مايـقـبــل الـذلـه ويرضى بــه
واقـفـى بوسـط الـدجـى تومي عراقـيبه=ولا مقعده في لـهـيـب الـهـون وانشـابه