في كل يوم يغيب عن عيني اصحاب

[الخنساء]

في كل يوم يغيب عن عيني اصحاب=ما اشوفهم ثاني سوى في حلومي

كلن يروح وكل فرقى له اسباب=ما غير ربي فيه حي معصومي

من راح راح ومن بقى بات منصاب=بين التوجد والسهر والهمومي

هذا بحادث راح معه الونس غاب=والاخر ايقض بس عيا يقومي

ونظرت حولك شفت من حولك اغراب=صقرين يمكن والبقيه رخومي

وبديت تحسب للقدر مية حساب=لامن ذكرت ان المعاليق تومي

وين المهار ووين طلقين الاشناب=وين الذي لاسرار قلبك كتومي

وين الذي شالك على روس الاهداب=وين الذي قلبه لقلبك رحومي

وين الذي ما كدرك يوم واغتاب=وين الذي لو نمت قبلك تقومي

وين المهاة اللي زهى وجهه حجاب=ولاشافتك تعبان عجزت تنومي

ولو تزعله با الحيل ما تبدي عتاب=تطبخ غداك وهي قدرها تصومي

قبل الدوام تودعك في ذرى الباب=تقول حاسب يابعد كل قومي

وش لذة الدنيا ليا غابوا احباب=يا شين لا جا يوم صرت معدومي

لو طاب وقتك يوم تاليه ما طاب=بردن شديد او في لهيب السمومي

آمنت با اللي للبشر نزل كتاب=وشلي برجوى غير ربي لزومي

الموت حق ويجرعه شايب وشاب=قانع مدام الله هو اللي يدومي

صح لسانك مليون

قصيدة جزلة ترجمت الواقع

الموت حق وطريق كلنا مقبلين عليه

الله يحسن خاتمتنا

لاهنت دام بوحك الجزل