(الحال ماهو حال)

[سناعيس]

قصيدة بعنوان
(أول الكلام وآخره)
أرجو لها القبول والاستحسان

أول كلامي قبل لا لساني يزلّ=سميت باسم الله لاجل التمامي
واقول لك ياصاحبي لاتخاذلّ=لاشفت ما يوذيك افزع همامي
لاصار وقتك ماسمح لك تجاملّ=خلك على ماقيل رجل عصامي
احزم أمورك وانتبه تزبن الظلّ =وخصوص لاصارت همومك عظامي
الوقت مثل السيف من غمده يسلّ=حده رهيف بيد كفيف وحامي
ترى التخاذل مايفيدك وتجهلّ=درب النجاة اللي مشوه الكرامي
كم واحد مسكين من عيشته ملّ=وياما ليالي مع عنا الجوع نامي
وكم واحد مثلك دموعه تهاملّ=من محجر عيون ضناها الهيامي
ان مالحقت وصرت تعرف تعاملّ =مع كل واحد باختلاف الأسامي
والا تراك تحس في عيشتك ذلّ= ويضيق صدرك تقضي الوقت ضامي
الحال ماهو حال الا يبي حلّ=ويبي نعيد المسأله بالتزامي
حال الكثير اليوم ماعاد يقبلّ=ياهو يغث البال والقلب دامي
هذا يتسكع دايم وبالشعر جلّ= مغرور حتى ولا يرد السلامي
وهذا يقلد كل موضه تنزّل =طيّحني وسلسال مع وشم شامي
وهذا كدش عقله رعاع ومختلّ= يمشي وهو في مشيته ما استقامي
وهذا معه صديقه وصاحب وخلّ= ما كنك الا تشوف طفل سيامي
وين الربيعه وين من قال ابفصلّ=وين المراجل بين نذل وحرامي
أشكي على اللي يمهل ولا يهمّل= حال يشيّب من كدره الغلامي
وصلاة ربي عد ماينبت الفلّ=واعداد من صلى وزكى وصامي
على النبي الهاشمي سيد الكلّ=اللي بعث للناس آخر كلامي

وسلامتكم
28 رمضان 1430هـ