~الـــرحـــــيـــــــل ~ { عناق أوّل}

[ابراهيم المهنا]

.

.

السلام عليكم ورحمة الله وبركاته

وكل عام وانتم بخير
.

.



الرحيل اللي خذا روحي / تسميّنه وداع .! =لا تسميـنه وداع وقدم عينك مصرعي
لوّحت يمناك بالتوديع واتعبتي الذراع= كنّ تلوحيك صعوط الموت والصمت النعي
لوحّي لي وارسمي وشمك على صدر الشجاع= طعنتين (ن) جعلها فدوة يمينك ودّعي
آه يا طعم الطعون اللي بكفّينك وساع= وان لمحتي دمْع عيني لا يردك مدمعي
صبري اللي ما جمعته كود لـ / أوقات النزاع= وأن طلبتي روح صبّك قلت لك يا مشجعي
شاعرك يوم التحفك الطيش واختارك ضياع= كيف ابذخرعن عيونك ياحياتي مركعي
لوّحي لي وان خذا جرح النهاية بتساع= دمّي المسفوح لا ياخذك عنّي / واسمعي :
والله إنّي يا الملاك الطهْر يالين النخاع=عاشقك من وعي روح الروح لين اللا وعي
يمكن انّي راضع(ن)عشقك وانا سن الرضاع= ويمكن أنّك يوم تكويني وانامضغة معي
ويمكن انّي يوم اعَـشْقك فوق حدّ المستطاع= أدري انّك مرّة(ن) فالعمر واسعى لك سعي
وادري انّي جيتك اسعى من صراع اليا صراع= وخانت الدنيا طموحاتي وعضيت اصبعي
وادري انّي قمت اسوي لك من البسمه قناع= واجمع الضحكات لعيونك واخفّي موجعي
وادري أنّي لو رويتك شوف وارويتك سماع =ضامي(ن) لك والعيون اتجوع وتحنّ اضلعي
والله أني يوم اصخّر لك مفاريد اليراع =ما تصنّعتك غرام / ولاكذبت / ولا ادّعي
جيت لك طهر الغرام وصافي النية شراع =واحتضنتي دفّة الخفّاق واطلقت اشرعي
والله أنّي ما بغيتك شيّ من عرض المتاع= كيف اخون الزهرة اللي ربّعت من منبعي
وآآه يا آخر لقاء/ ما دام ما فيه اجتماع= استبيحي ما تشائي و انثريني واجمعي
اجمعيني واحفري لي من تحت ماطاك باع= وارفعي كفّيك للرحمن وابكي وادّعي
يغفر الله زلّة المجنون يوم اسرف وطاع=هقوة(ن) خانت شتات العمر من بين أذرعي
ذا رحيلي أوْ رحيلك لو تقولين الوداع =لا تسمينه وداع وقدم عينك مصرعي ..!!

.

.

.