ما للوفا في شرع الانذال قيمه

[احمد الجريفاني]

قالت وفيت ! وقلت هذي ظليمه=متعجبه كيف الرجاجيل يوفون!

يا بنت ما اظن النوايا سليمه=لو تعرفيني زين ما قلتي اشلون

الشك با اللي شال حملك جريمه=كيف العنود تقابل الطيب بطعون

كنت احسبنك با لاوادم فهيمه=وشلون ما تدرين والناس يدرون

قلتي بعظم السانك انك عظيمه=جرب تلاقيني كما كنز مكنون

بنت الرجال اللي شهد له خصيمه=ناسن على سلم الاجاويد يمشون

ياما وعدتيني على الوسم ديمه=وانا وعدتك مسكنن داخل عيون

زل الوعد ما جا من الغرب غيمه=ضاع الوفا عندك وانا احسبه مصيون

اللي بنى لك قصر يسكن بخيمه=واللي مسح دمعك تركتيه محزون

وقتن ظهرتي فيه ما فيه شيمه=من سبتك صار الوفا حيل مغبون

اصحي لنفسك كانك اليوم نيمه=من ينكر المعروف للخزي مرهون

واستانسي فزتي وذقت الهزيمه=وفيت دينك بس انا اصبحت مديون

ما للوفا في شرع الانذال قيمه=ولا للكرم عند ابخل الناس ماعون!

الطيب والنخوات دقه قديمه=واللي يثق با الغير فاقد ومجنون