يـــا ســدرة الغــربي !!

[شجون القصيد]

متواضعه اتمنى ان ترتقي لذائقتكم


السدره اللي تحتويني عن السيل = وان اقبل العاصوف لذت بحماها
ماكنت اخاف الحر والبرد والليل = ولاهمني سود الحظوظ ورداها
عديتها ذخر الليال المقابيل = ياكيف كنت افخر بها واتباها ؟
وان ضاق صدري قمت اسوغ التراتيل = في ظلها وانعم بريحة شذاها
ويروح وقتي ماحسبت البهاذيل = اهنا بشوفتها واهيم بغلاها
اسقيتها دمي وعطرتها هيل = وطعّمتها شهدٍ مزود حلاها
ونادمتها بالشعر ياعين ياليل = ورشفت حتى الموت صافي هواها
وهي سقتني من غلاها فناجيل = اليوم مدري ليه بين غثاها
تغيرت ماعاد يحلا لها سهيل = ولاعاد تعجبها شجون وعطاها
صارت كما الحنظل ولو يشرب النيل = الطعم علقم والمرار يغشاها
ياسدرة الغربي وحلو التعاليل = وش غير الايام جانا شقاها
وين الوعد ليه الجفا والغرابيل = من يحمي القمري اذا الليل جاها
وان هزها العاصوف وارعّد بها ويل = وين الملاذ اذا تبارق سماها
انا لي الله يوم زادت على الميل = هو العليم بجهرها وبخفاها
قولوا لها ماعاد في خافقي حيل = فرقاه مهره والفؤاد امتطاها
اليوم شمت وطافحٍ عندي الكيل = يحرم عليا ظلها مع جناها