انا ما ذبحني غير من دق لي جوال

[الطائر المهاجر]

انا ما ذبحني غير من دق لي جوال = رمى لي التحيه ثم قفى وخلاني
تذكرت صوته بعد عمرٍ مضى لازال= ينقض جروح صامده عبر الازماني
حبيبٍ لبيبٍ حطّ له في القلب منزال= لأنه عفيفٍ طاهر الروح انساني
تلاقت بنا الأرواح غصبٍ عن العذال=وكانت بداية حب في الله رباني
احبه كثر من دوّر لصالح الأعمال= بصلاةٍ وحجٍ لو دفع غال الاثماني
احبه حقيقه ما بها شك ولاّجدال =فمسكنه وسط القلب نبضٍ بشرياني
ولكن مع الأقدار ما تجدي الأفعال = فكلٍ مشى بدربه ولا يدري الثاني
وراحت سنين العمر في الهم والغربال= على طيف ذكره ينتحر شوق وجداني
انا لا ذكرته ارفع الصوت بالولوال= واجر الحزن من قلب مجروح ويعاني
اسير الهموم بحالةٍ ما بعدها حال = حسيبي على منهو السبب يوم خلاني