اعتزلت الشعر ..

[حسن الشريفي]

قصيدة لأول مرة ..ترى النور ..

اتمنى أن ترقى لعالي ذائقتكم


اعتزلت الشعـر

إعتـزلت الشـعـر .. يا دنيــا القصيــد=منْه اخـذت اللي بغيت .. وقلت كافي
عفت ترتيب الحكي .. وشيـل النّشيـد=وزحمة الأوزان .. واصـوات القوافي
ما اعْـتزلت الشعر .. من قلّ الرصيـد=جيت وافي .. واعتـزلت الشعـر وافي
يشـهـد الجيّـــد .. ويشـهـد لي البليـد=انّي بالترتيب اســاسي .. مو اضافي
القلم جــلاّد .. وحْــروفـي عـبـيــد=والقلم حسّــاس .. وش هــذا التنـافي
هذا هو اسلـوبي .. واسلـوبي فريـد=تحضن امواج الفكر .. رملة ضفافي
جاهلي شعري .. ويشبهني لبـيـــد=وخالد الفيصل .. ومعروف الرصافي
مدرسة بدر .. وفهد .. وابن الرشيد=علّمتني .. كيف امارس .. إحـترافي
كيف اصوغ احساسي بالفكر الجـديد=والقـط الدانـات .. من فـمّ المـرافي
أكتب الحكـمــة .. ولي راي ٍ ســديد=وآتغــزل .. لكــن ثْـيـــابي عــفــافي
لو أبي لي .. ألف بيت أكتب .. واعيد=ألف ثاني .. غير الأول .. باختـلافي
كنت انا فالشعــر .. هارون الرشيــد=دولتي دولــه .. وسلطــاني خرافي
ما أبـالـغ .. لـكـن الـشيّ .. الأكيـــد=منْه اخـذت اللي بغيت .. وقلت كافي