لا جتك كلمه تجرحك وانت غافل

[الطائر المهاجر]

لا جتك كلمه تجرحك وانت غافل = ممن جهل بك جامحٍ به حصانه
فانظر لمن صاحبه للشر فاتل= معروف ميله للردى والعفانه
ودامه تكشّف للملا بكل حاصل= وما عاد له حجه امام الإدانه
يدخله في الشكه معه دام جاهل= ولو هو نقيٍ مامشى في المهانه
من بعد كشفه صار ماهوب جافل= يضحي بصديقه ماتفكّر بشانه
فاللي به الأيدز فلاهوب باخل= في نشر فيروسه عيانٍ بيانه
ويستخدم صحيبه مثل طير زاجل= يرمي الشراره دام يدّه جبانه
فاحذر رعاك الله من كل خاتل= ماضيه يحكي عن سبايب جنانه
ومن جالك بهرجه يبي كود تاصل = بليا دليله لاتثق في امانه
وان كان تاثق فانت عن قصد فاعل= تدفع ضمن ما تفعله من رعانه
لانّه يبي حرقك ولاهوب سائل= وتكسب عداوة من جهلت لكيانه
ما كل صاحب تعرفه قبل راجل= ماشي على خبرك بعقل ورزانه
يمكن تغيّر واصبح اليوم سافل= واصبح يجرك للردى والمهانه
فمن صاحب الاجرب فلاهوب ناقل= إلا الجرب مادام يمشي وزانه