اسمح لي انسى

[احمد الجريفاني]

اسمح لي انسى كل شي(ن) معك صار=ساعدني امسح زايف الذكرياتي

اخطيت في حقي وغلطاتك كبار=ارجوك تبعد يا شقى عن حياتي

عيبي صدوق وعيبك انسان قمار=اللي بقلبي تسمعه من شفاتي

تحب راسي ثم تبدا با الاعذار=تظن ضعفي يا خطا في سكاتي

من رحمتي جاملتك مرار ومرار=وغديت لك مثل القراح الفراتي

وانا احترق وبداخلي لاهب النار=وانته ولا فكرت يوم بهناتي

ان كان لك قلبن مصنع من حجار = انا فوادي ما صنع من حصاتي

شاعر حنون احفظ مواثيق واسرار=ارعى الحقوق وشيمتي هي غناتي

في سبة العشره تحملت الامرار=ما اظن به حي(ن) يسوي سواتي

لي سيرتن يشهد على صدقه اخيار=ما دمت واثق حقي ابدي صفاتي

اهوى الطرب وتهزني قرعة الطار=واعرف ربي وابتهل في صلاتي

افخر بربعي واعشق العز والكار=وارضى بكل اللي من الرب ياتي

اشرب قهوة الهيل ما اطيق مسمار=واضمد جراح الحفاة العراتي

ما تعرفيني زين يا بنت الاخيار=ليش اني امسح دمعتي في عباتي

والله لو انك زبده وبنت جمار=عقب الذي عانيت مالي مباتي

الاجودي يصبر ودمحاته كثار =الا الخشم ما عقب لمسه سكاتي