انا طيّب ولكن غير ساذج

[الطائر المهاجر]

انا طيّب ولكن غير ساذج= لبيب وفاهمٍ معنى الإشاره
احسّب كل مردودٍ وناتج= بعلم الطيب لا علم التجاره
عركني الوقت مع درس المناهج= وعرفت الناس من بدو وحضاره
اذا من شفت لي شخصٍ يلاجج= على الباطل فعرفي له خساره
فراعي الحق ماهو من يحاجج= تكفي البيّنه ترفد جداره
واذا من شفت من بالضحك هازج=خذيت الحذر حتى اعرف مساره
فبعض الناس لو بحجاج بالج= خبيث وماكرٍ باهل الطهاره
واذا من شفت من فنخره نافج= ومغرورٍ وسمته باحتقاره
واذا من شفت بالهرجات سامج= عرفته طبل لو هو في الصداره
واذا من شفت مثل المر لابج= على كبدي كويته بالشراره
واذا من شفت من بالفحش هارج= عرفته ماشيٍ نحو انحداره
واذا من شفت من تأسره داعج= عرفته خبل قلبه باخضراره
فلا هو عارفٍ وين المخارج = عطى عقله لغيره باختياره
يقول الحب في قلبي لغانج = ولا لي حيلةٍ بالقلب ناره
مدام الحب يدرس كالمناهج = ترى معظمه تمثيل بمهاره
احب الرجل عقله دوم ناضج= واحب البنت بحرٍ بالغزاره
اذا من شافت اللي شبه عالج= عطته النار يوقف من خواره
ولو ترسل صواريخ البوارج= تهده لين ما يفقد وقاره
يجنبها على كل المدارج = ومن مثله اخذ درس بنهاره
ترى اردى الناس من يهوى المباهج= على حساب العقل في كل غاره
وترى اردى الناس من بالمكر دارج= يظن الخبث في دربه شطاره
واذا منّك سبرته شفت ناعج= يدربي الراس مايدري مساره