صندوق الاحساس ..

[حسن الشريفي]

لأول مرة ..
ترى النور
لعيونكم ..

.. صندوق الاحساس ..


الليـل .. يا سـمّـار .. بيـتـي .. وداري=مستودع اسراري وصندوق الاحساس
من لامني في الليــل .. ماهــو بداري=انّي أنــا .. والليـل صحبـه .. وجـلاس
أغليـه .. وارخص لجْل عـينه نهـاري=غالي ومن زود الغـلا .. ماله اقيـاس
وزاد الغـلا .. ما عاد للشمس طــاري=لا غاب قرص الشمس ماكنّي في النّاس
أشتـاق له .. واهــدم عشــانه جـداري=وابني من احساسي بيوتٍ على ساس
أعـشق توالي الليـل .. احب المساري =وآخـاوي نجـوم ٍِ لها .. لمعـة ألمـاس
وآحب لي نجـمــة .. تغيــظ الغـــداري=أسـري لها ليـلي .. ولا غـيري عسّاس
حبيبتي نجـمـه .. لهـا جـسْـم عـــاري=صورتها مرسـومه على وجه قرطاس
وفي صدرها طعـسين .. ماهي صحاري=آنـا خبيـر ٍِ .. بالصحـاري .. والاطـعـاس
يتـوه فيـها .. لا ســرى الليــل ســاري=وطعـوسها .. يلقى بها قلبي احـسـاس
لا حْـد ٍ يـروح بْعـيـد .. ماني نـزاري=آنـا وريث الطيـب .. والدين لي ساس
فكـري يـروم الريـم .. عـاف الحبـاري=وريم القصـايد .. ما تجي دون وسواس
من دونـها .. حالت أســــود ٍ ضـواري=وبيني وبين عْيــونها .. صفّ حــرّاس
والقـاهـا في ليلي .. وانا الليـل داري=مستودع اسراري .. وصندوق الاحساس