قصيدة الذكريات

[عمر ال شيبي]

الاخوة اعضاء ومشرفين وزوار منتدى الفطاحلة الكرام
السلام عليكم ورحمة الله وبركاته وبعد
يسعدني ويشرفني ان اشارك معكم بهذه القصيدة
وهذه الأبيات وجهتها إلى صديقي العزيز الشاعر / مسلم العميري ، وأرجوا أن تحوز على رضاكم

يامسلم صار في قلبي حنيني=حن قلبي للسنين الماضياتي
حن قلبي للبداوه والضعيني= ودق في قلبي ناقوس الذكرياتي
شاقني شوف المزون اللى تبيني= كنهن روس الهضاب الشامخاتي
تسوقهن ريح الجنوب لهن رطيني= مرعدات مبرقات ممطراتي
شوفهن ذكر قديمات السنيني= وذكر ايام علينا غالياتي
ومر كل اللى مضى قدام عيني = كنهن قدام عيني مصوراتي
اتذكر يوم حنا راحليني= والرحايل بالحمول محملاتي
والرعايا للضعون مبارييني= مع طلوع الشمس كلهن راحلاتي
يوم كان البدو دايم ناجعيني= يتبعون الغيث في كل الجهاتي
وين ماحل الحيا له تابعيني= عشقهم شوف الديار مربعاتي
واتذكر يوم حنا نازليني= بيوتنا وسط الربيع مبنياتي
زين منظرهن وهن متجاوريني= وابوابهن للضيف دوم مشرعاتي
واتذكر يوم حنا مصبحيني= موقدين النار من بعد الصلاتي
شق بيت للهشيم مراكبيني= نارهن تدفيك عن لبس العباتي
مع دلال للنشاما جاهزيني= دلال كيف للنشاما مبهراتي
واتذكر يوم حنا سارحيني= والرعايا حولنا متفرقاتي
وكل هموم الناس عنها مبعديني= همنا في شياهنا اللي مرتعاتي
واليوم حنا في المدينه ساكنيني= في بيوتا بالابواب مقفلاتي
مقيلنا عن الشمس في ظل سميني= وعن السموم النوم تحت مكيفاتي
وحريمنا في بيوتنا متريحيني= وكل شغل البيت عند الخادماتي
وقهوتنا والشاي في ثلاجتيني= وكلهن عند العذارى مسوياتي
واطفالنا عالبلاي ستيشن ساهريني= والا سبايس تون والا مسلسلاتي
و اكلهم من البوفيه مشتريني= ساندويش وقمبري والملحقاتي
يامسلم لوني بيحت الكنيني= مايكفيني ثلاث مجلداتي
لكن كلمة حق للي منصفيني= اقولها بالصدق ماهي مجاملاتي
اقل شي من الحضاره كاسبيني= مكسب التعليم لعيال وبناتي
ويامسلم باللي قلته مكتفيني= وكتبت لك بايجاز اجمل ذكرياتي
وختامها صلوا معي ياسامعيني= على النبي المبعوث لكل الكايناتي

صح لسانك نعود للتميز والتقدير لا هنت