مجاراة لقصيدة / الجرح أرحم

[عبدالعزيز ابراهيم المنصور]

بسم الله الرحمن الرحيم

قصيدة / الجرح أرحم .. للشاعر عبدالله مرعي الظفيري



اللي بقى لـي مـع الأيـام .. وفّيتـه=والضيق لـو ينهمـر تشربْـه وديانـي
ماهي كبيـره علـي والحـزن غنيتـه=وْلاهـي غريبـه إذا وقتـي تحـدانـي
الخوف يا من نبشت القلـب وادميتـه=لاعشت زهرة شبابك وانت وحدانـي
كم جرح خذْته من الأحباب.. ضمّيتـه=وجروح قلبـي زكـاة الحـب خلاّنـي
مطعون؟ عادي جفا الأقراب؟ داويته=تعبان؟ مبطي ردى هالحظ؟ خاوانـي
صدمه؟ بسيطه ،، هَوان الحـال؟ مرّيتـه=مقرود؟ أدري وإذا حرمـان؟ عدّانـي
ما فـاح هـمّ ٍ لـك الله مـا تقهويتـه=ما مـرّ حـزن ٍ بغيـري مـا تبلاّنـي
ياما ويامـا مـن الخـذلان .. عديتـه=إلا بصاحبْ .. بعد عِشـره تناسانـي
أزريـت لأنسـى غيابـه ليـن ناديتـه=والمـوت لامـن تجاهلنـي وجافـانـي
وينه يجينـي .. وكـل عْتـاب كنّيتـه=ياليت يدري بعـد فرقـاه وش جانـي
من كنت طفل ٍ وانا أرجـاه فـي بيتـه=شيّبت.. واثره على هالحـال خلانـي
حتى جنـاح العَتَـب لرضـاه ذليتـه=ماطِرْت بعده فـرح مـن ذلّ جنحانـي
يا قلب صبرك .. ترى كل شيّ سويتـه=ما كان أفضل من اللي كـان بإمكانـي
لو بيّ قـوه علـى الهجـران خليتـه=لو بـيّ ذره مـن النكـران؟ يفدانـي
الجرح أرحم .. إذا يرجع مـن أغليتـه=مجروح؟ فِدوه .. ولكن صعب وحداني!


ومجاراتي لها والرد .. الجرح قاسي



ياللي حسابك مع الايام صفيته=قصيدتك شفتها في كل ميداني
يالشاعرالمبدع اللي ذايع ٍ صيته=مشاعرك صادقه وتثير الاشجاني
ابصوتك العذب يامخفي تناهيته=بان الحزن في عيونك فوق الاوجاني
كثير ناس ٍ تعاني ماانت عانيته=مجروح وتشكي غرام ٍ منه مرضاني
الجرح قاسي مادامك ماتحريته=من واحد ٍ شايله في وسط الاعياني
على جميع البشر بالحب خصيته=واصبحت لجله عليل القلب هيماني
ياخوي عزك يابو مرعي تمنيته=ابيك عايش حياتك دون حقراني
الخوف قلبك اذا للذل حديته=تذوب زهرة شبابك وانت منهاني !
والموت موت المشاعر كان حسيته=كنك وحيد ٍ تعيش فبحر الاحزاني
الضيق يظميك لوانك تحديته=لو ينهمر ضاق بك صدرك والاوطاني
تخدع ظنونك وجرحك ماتناسيته=تقول .. فدوه ولكن صعب وحداني
من يجرحك راحتك لاقفيت وجافيته=خله يعاني ويشكي مر الازماني
مادام ماقدرك رغم اللي اعطيته=من صبر من حب من طيب ٍ وتحناني
دور بداله ولو باحساس حبيته=يعيضك الله بداله واحدن ثاني
هذا كلام ٍ من الخاطر لك ابديته=انس الذي ماجزاك الا بنكراني