جفوة قلم .

[فرحان الفيفي]

علامك يا ورق تجفا قلم له في ثراك لحود=لشاعر مات في شعره هواه وعاش بفؤاده
وأيامه حطبْ مرّت عليه النار عودٍ عود=وما باقي سوى موقد شكى من كثرة رماده
وعمرٍ ما بقي جوفه من الأيام غير السود=غشَى شمسٍ تهادت فيه هَمّ الليل وسْوداه
واسمٍ من سجل السعد وافراح العمر مفقود=وجسمٍ صارت أكفانه لجرحه أفضل ضمادة
وأنا وش لي بهالدنيا إذا صار القلم محسود=على كلمة :أحب وصار صمته يقتل إنشاده
يسافر في عتيم الليل وأنفاس السراج رقود=مع كحلك وأنفاسك يدوّر فيهم بلاده
وإذا شقّ الفجر ليله وأبصر دربه المسدود=رجع ظامي وغيث الليل ما بلل له أكباده
يزوّر بسمته يخفي وراها مقبره وحشود=من أكفانٍ تلف الصمت لين الموت يصطاده
أنا لي يا ورق ذكرى طفلْ من جنته مطرود=فطم قبل الأوان وشاب في قيده وأصفاده
تعب من رفقته ظله وضاق بصمته الجلمود=وملّ الدمع من عينه بعد ما صار له عادة
إلين الموت صارْ أشهى وأصبح آخر العنقود=لقلبٍ يختلط دمه مع صرخات نقّاده
وإذا كان القبر نعمه وأصبح أفضل الموجود=فيا بخت الذي يسبق ويسكن قبل حساده