الى ابنتي أشراق !

[عبدالكريم العياش]

هذه القصيده بابنتي المبتعثه لتحضير الدراسات العليا في كندا





دامت منامات عينك يامرززني = بااعلى كراسي شموخك عنهم امتازي

من غرقة النوم جاء طيفك وفززني = ياصعب فقدك علي يااعز اعزازي

أصبّر القلب عنّك بس عجزني = طيحتني طيحة(ن) ما كنت متوازي

كم قلتي ياابوي آترجاك نجزني = من لاتحدى الصعب يموت ما فازي

وماادري القراده او الرحمان قمزني = وقلت أبشري دام لك بالمجد مركازي

ياطهر ارض(ن) غسلها الله بالمزني = يانبتة(ن) كلها خيرات واعجازي

من شان خاطرك صبري عنك عززني = واذا انكسر خاطري أدواي بالرازي

يافرحتي وانكساراتي وياحزني = القلب وانتي هنا لك دوم منحازي

ماكن احد غيرك الله فيه خززني = ما اريدهم كلهم ، لك انت معتازي

أول ولا القنبله تقدر تنززني = وهالحين . ياشين هذا الحين يالجازي

بعثرني الوقت من بعدك ولعوزني = ومن أحتسب لله بخيراته يجازي

كل شي بعدك على العبره يحفزني = ومن كل ركن(ن) يجي للدمع أيعازي

يالله.. بزيادة(ن) بالعمر فوزني = حتى تخلّص دراسه ريمة الجازي