العيد جانا وكل عامٍ بنقصان

[الطائر المهاجر]

العيد جانا وكل عامٍ بنقصان= الضعف واضح في ذواب الهويه
والغرب متسلط علينا بحقران= كل يوم والثاني نشوف الأذيه
جونا بخطه اسمها حرق قرآن = من بعد ما سبوا رسول البريّه
خلو بطلها قس مشبوه بجنان = يمكن يبي تكريم مثل البقيه
يوم كرموا الرسام في دار الالمان= واعطوه نيشانٍ بفعل الدنيه
ويمكن يبي شهره وذا فيه قولان= فيمكن موجه من عقولٍ غبيه
تبي تجس النبض بديار الايمان = وتبي تسمسر كود تقبض هديه
امن الشيوخ اللي لهم بالأمر شان= ولهم كنوز راهياتٍ عليه
ويوم قبضوا قالوا نقايض بميزان= تلغون مسجد قد نويتوا بنيّه
حول مركز التفجير تعلون الاركان= وانتم ورا التفجير ياليعربيه
وكل الوثائق تثبت بغير بهتان= انهم هل التفجير واهل الرديه
شهادة من بعضهم خير برهان = بالصوت والصوره ولا به مريه
فمن قالوا انه يحمل اسماء عربان= لازال حي وجاهلٍ بالسويه
ومادام حنا بضعف في كل ميدان= تلصق بنا التهمه على ادنى قضيه
ياواثق بالذيب يقرب من الضان= لو هو تبسم فيه خبث الطويه
عدو جدك مانسى كسر صلبان= وتحطيم فارس والجيوش العتيه
وبسط النفوذ بشرقها لين تطوان= والأندلس معها بدوله قويه
بنت حضاره كلها عدل وايمان= وساد الأمان ربوعها والبريه
ومنها خذوا علمٍ بلا اية اثمان= لين وصلوا للمجد في سوء نيه
ثم انكروها يوم ضعفت بجحدان= واستقصدوها بالتهم والأذيه
ما اشره عليهم دام حنا بنقصان= اشره على اللي يرتجيهم رجيه