الى (شقيقتي ) بعد ايام على فراقها

[احمد الجريفاني]

ما نزل دمع يشفع لي بوقت المصاب=با العزا ما به احدن قال عني حزين

مبتسم تقل ما با القلب طعنة حراب=راودن شك بان الحزن دمعات عين

قمت اهوجس وادير الفكر وشلون غاب=عن عيوني هذاك القبر واللي دفين

قبل (برزان) في (صديان ) حفر التراب=عقب (برزان) في (صديان ) لبنه وطين

مدري شلون جيت ومدري من اي باب=مدري شلون رحت ومدري عن اي شين

المصاب الجلل ينسيك ما با الكتاب=ربي اغفر وسامح غفلة المومنين

زل وقت المواسى حل وقت العذاب=عقب ما الناس تقفي كل مابي يبين

ادري اني بعاني لوعة الاغتراب=كيف وانتي غلاي ومهجتي والظنين

يام عبدالسلام القلب بقفاك شاب=في غيابك يشيب الطفل في ساعتين

عشت معك الطفوله والجهل والشباب=عشت معك الرجوله والولع والحنين

قاصرين و يتامى زادنا الاحتساب=كسرة الخبز نقسمها الي وجبتين

يمضي العيد ما نلبس جديد الثياب=ما طلبنا سوى المعبود منهوا يعين

ربنا قال من يصبر بامره يثاب=يا الهي رجيتك ثبت الصابرين

ماحدن وجه لربه سواله وخاب=اسكن (اختي) جنانك يا القوي المتين

انت رب البريه رب يوم الحساب=اجمعن با الحبيبه يرحم الراحمين