حروف العاشقين

[ماجد الراشد الهيري]

حروف العاشقين


أشوف النور من عيني يضوّي=وأنا ماشي طريقي خطوتين

وكــل ماجيت أقربها واضـوّي=خذاني اللـيل بأسرابه كمين

جلست بحينـهـا كـنّي أهـوّي=وأنا بقلـبي صلاة المسلمـين

أعيش الصمت لحظه واتروّي=على ذكرى مـن أيام السنين

أهنّي عزلتي وأعطيه جـوّي=وأعايش مابقـى فيني دفـين

ياريــح النفل والاغصان زوّي=أباخذ مــن خـوافيها الثّمــين

وأذا بالشـعــر لاوالله تـــوّي=لو اكتب في رجاها وأستبين

انا ودّي بغلاها ويش أسوّي=وأنا عـايـش بالهــدنيا رهـين

صدح صوت اللحن منها مدوّي=يعالج داخلي شي(ن)حزين

يانظره في خفوقي لي تروّي=جميع عروق جسمي للوتين

كحيل العين ورموشه تقوّي=مع خدود(ن) حلاها بحمرتين

يامبسم أنرسم بالوجه لوّي=جميل اللي على شفاهه يزين

لاهب الريح في شعر ه يلوّي=عـلــيها كــل راحـات اليدين

وصدر(ن) لابــدا يمـي يهوّي=وأنا عيني على هالوردتــين

وخصر الريم زاين وأمتــروّي=أذا مالت يسار(ن) مع يمين

حبيبي والشعر لجلك يطوّي =على متني حروف العاشقين

شعر/ماجد الراشد الهيري