سوالف عطر

[نجد الضاوي]

سوالف عطر من بوح القصايد والشعور أبيات=تولّعني على شوق الحروف وصفحـة كتابـك

صحيت بصوت خلجات المشاعر رغمها بسكات=توقضّني على جمر المعانـي ونظـرة عتابـك

نسيت الجرح ودروب الشجون وسكّة الآهـات=نسيت الضيق وأحزان الوجوه بلمحة أهدابـك

لقيتك حب ما ذقته بليالـي عشتهـا بشتـات=تنفّستك دفا حضن الضلـوع وضمّـه ثيابـك

ولهتك موت يالعذب الحنون ونسّني مـا فـات=أبي قصة عشق تحكى ولا ينسونهـا أحبابـك

تعبت أعزف على لحن المسافة والدروب أوقات=أداعب غيمة الفرقـى حبيبـي ملّـت غيابـك

رسمتك حلم ياوردٍ نبت فـي داخلـي باقـات=تسامرني ملامـح هالغـرام وريحـة أطيابـك

طواني حزن يجتاح الفـؤاد ويخنـق اللـذات=وذا بَعدك سكن نبض الخفوق إحساس يحيا بك

حبيبي مارحم كف المدامـع صافـي العبـرات=بعد صمتٍ سكن عين الشواطي قبـل يقرابـك

عطيتك عمر من بدّ الخلايق ما يبيلـه إثبـات=يسابقني على درب الخطاوي لا وصـل بابـك

كتبتك حرف من سهد النواظر يالغـلا بالـذات=عطيتك عذب قطرات القوافي لجل ترقـى بـك

تباطيتك وله يـوم الأمانـي ملـت الخطـوات=وأشوف إن الزمن راضي حبيبي يوم لي جابك