من يستهين الشعب لا جاع غلطان

[الطائر المهاجر]

من يستهين الشعب لا جاع غلطان = يثور كالبركان محدٍ يوافيه
وفي تونس الخضرا دلاله وبرهان= ومن لا اتعظ ماجاء على "زين" ياتيه
فقطع الرقاب ولا قطع رزق انسان= ممن يشوف الجوع للموت حاديه
وغيره منعّم ما اشتكى ضيم الازمان= يسرق وينهب والولي مادرى فيه
يخدعه من حوله رخومٍ وغربان = باخلاص كاذب لو تقبّل مواطيه
وتضرب بسيفه بكل ظلمٍ وبهتان= ولا خافت الرحمن يومٍ تلاقيه
اهل النفاق اللي لهم بالمكر شان= منهو وثق فيهم لقى ما يعنيه
ياسرع قلبتهم مثل طير برمان = وياسرع ماهم من يسبه ويشنيه
ومن قلّب التاريخ في عقل وامعان = يدرك بان الشعب مع من يراضيه
ويكسبه بالمعروف في عدل واحسان= ويقرّب اللي بالنصيحه يواليه
ويبعد هل التطبيل من كل شيطان = من كل فاسد بالمدح دوم يطريه
فالكامل الله ما بها أي قولان = ومن لا عرف نقصه ترى ابليس مغويه
ومن عامل لشعبه مثل أي قطعان = وسلط عليه كلاب بالظلم توذيه
مهما يطول الوقت يدفع للاثمان = ويجيه يومٍ ما تحرى حراويه
اما من الله عالمٍ سر الاكوان = بامراض تستعصي على من يداويه
او من قريبٍ ما خذا له بحسبان = يطعنه في ظهره ولوهو مواليه
فاالعاقل اللي واضع العدل ميزان = وادّى الأمانه عارفٍ وش تواليه
فالشعب امانه من حملها ولا خان = كسبان دنيا وآخره في مساعيه
ومن خانها لابد في يوم خسران = ولا ينفعه منهو على الشر يغريه
وحنا بدار العز من خير الاوطان= بقيادة اللي يعرف الله ويرجيه
وعضوده اللي شايلينٍ للاركان = من كل ليثٍ للوطن درع يحميه
ينصرهم الرحمن في كل ميدان = على الحقد والمكر واللي مشى فيه