احساس وجداني

[نجم الإبداع]

القلب لو ذاب من حب البنات الغيد مالومه=لاجل الهوى من سهوم اعيونهن واحساس وجداني
اكيد حب العذارى له صروف وحال معلومه=خصوص لاسلهمن بالطرف والموق ايتحداني
انا شربت الهوى من صغر سني واعرف كلومه=ياويل قلب الهواوي لافتكر مابات سهداني
صوت العذارى نغم يسري لقلب الصب ونعومه=غنت لزرياب ولاده وانا لو جيت مامداني
ياويل قلب المعنى لو شكى والنفس محرومه=وجر بالصوت تالي الليل والطاروق حمداني
بالله ياهل الهوى جيبو حبيبي واعرف رسومه=ابو العيون الذي فيها الحور للعشق وداني
عذب الثنايا ليا اتبسم ورود وثلج بكمومه=والشعر الاشقر على المتن الذي لامال برداني
وان كان ماشفت مضنوني وغابت عني علومه=باموت من طول بعده والوله لاجله تماداني
انا اشهد اني على فرقاه شفت الروح مصرومه=اظلم علي الوجود وكل حيٍ قام عاداني