جيت للمجلس ابي شخصٍ فهيم

[الطائر المهاجر]

في قصيدة سابقة تعرضت لبعض الشعراء الذين يردون بدون قراءه ، مطلعها
اشهد ان البعض يقرا الشعر مرتين = مرةٍ بالفؤاد ومره بناظره
ولكن الأكثر خطورة حينما يأتي الرد بناءاً على عنوان القصيدة ،
فمنه يحكم على الشاعر وعلى القصيدة خطأ ، فكانت هذه القصيدة
http://up.ftahilah.com/up/uploads/Mine/JeetLlmujlis.rm

جيت للمجلس ابي شخصٍ فهيم = يفتهم للي كتبته من قوافي
مجلسٍ معروف بصقوره قديم = اختلف عني ولا ادري بالخوافي
لا لقيت الرد اطلب يا كريم = كود هاللي رد يفهم للقطافي
وين من يقرون بالليل العتيم = يظهرون الحرف لو فيه التفافي
الشعر معنى ومغزى من "سديم"= يفهمه شاعر على الجزلات وافي
غير صار اليوم وضعه كاليتيم = تايهٍ في الدرب عريانٍ وحافي
كل واحد شايفٍ نفسه زعيم = ومن وصل للضوء عدوه الرصافي
لا نتقد عنوان شافوه الحكيم = ولو طمر كل القصيده لا اختلافي
ماسك الطاره على خط القصيم= واثره الواهم على خط المصافي
عند ربعه كالبحر لاجا لطيم= وعند راع الفكر فكره بالجفافي
يعرف انّه لو هو الرجل الكريم = ما يفرق بين عله او زحافي
ما كتبت الشعر لعيون الحريم= ولا كتبته كودي اطلع في الغلافي
اكتبه لعقول تفهم للفهيم = تعرف ان الشعر كالسمر الرهافي
يرجع اللي مال للدرب القويم = وينتقد للوضع لاشاف انحرافي
ولو دغمت الحرف منهاجي سليم= واضح الرؤيه ولاني من يخافي
من جهل يسأل ولا هو بالأثيم= الأثيم اللي عطى رأيه جزافي