يــــــــــــــاعزوتي

[احمد الجريفاني]

يحق لك تدعين حورية الحور=ويحق له تزهر ليا سرتي القاع



ويحق لك يطفى ليا جيتي النور=لو ما يطفًى كان من شرقتك ماع



جيدك فنار وقذلتك ظلمة ابحور=وخدك نهار وبسمتك ضيق مرباع



(بوكيه) ورد مغلفينك ببلور=جوري منقًى منظرك قمة ابداع



فزتي بتاج الزين تصويت جمهور=كل الخليقه صوتوا لك با الاجماع



غريبه انك بنتٍ لتسعة اشهور=وانتي فريدة شكل واوصاف وانواع



في لفتتك ريمٍ مذيًر ومذعور=يفز من ظلًه مجفًل ومرتاع



وفي نظرتك حرٍ شلع شقة النور=ما يتعبه طير الحبارى ليا فاع



ياعزوتي كل الحلى فيك منثور=الملح والقبله وزينات الاطباع



من مات باسبابك من الناس معذور=ومن راف به طرفك لاوآمرك ينصاع



ومن شاهدك ياقف على الدرب مسمور=ما يحترك مشدود للهم جرًاع



زايغ بصر من شاهده قال ما جور=على شبابه قبل ما يهتني ضاع



ما يبرم الكلمه مجمًد ومقهور=ما تسعفه نخوه ولا صوت فزاع



ياعزوتي وش بك علي جايره جور=روفي بحال اللي من الوجد ملتاع