بعض الخطا ...ما ينجبر

[الطائر المهاجر]

بعض الخطا كالعظم في فخذ شايب= اليا انكسر ما ينجبر في سهوله
ولا من خطا الإنسان في حق نفسه = لابدّ يتحمّل نتايج فعوله
واكبر خطا لا صار والعقل غايب = ما ينترقع بعد شيب وكهوله
ومن طاوع الشيطان افقده حسه = واعماه عن درب الشرف والرجوله
ياما انحدر شيهان من راس نايف = باسباب فعله لحظةٍ من ذهوله
وياما تعلا بوم دربى لراسه = مادام له ظهرٍ يعدل ميوله
وياما رفيقٍ خان رفقة رفيقه = واوشى به المن كافأه بالعموله
زمانٍ به الرجال ماعاد يامن = رفيق وصديق ومنتسب للحموله
فكلٍ بهذا الوقت يبحث عن الثراء= او الجاه لو بالذل يبغى وصوله
فخلك حذر ما كل غلطه بغلطه = مادام مالك ظهر يسندك طوله
لا تقول انا معروف بالعلم والعمل= لا شي يشفع لك بوقت الثعوله
ثعالي ليا قابلت تضحك بسنها = ولا من لقت فرصة ذيابٍ قتوله
لك الله زمان يقتل الحر بالقهر = وينعم به اللي طبل والبوم حوله