اليوم قام الحظ بعد العداوه

[فارس القوافي]

بالله خلّيني على صدرك ارتاح = تعبت من طول السهر والشقاوه

كم لي اشيل الهمّ والهمّ ذبّاح = ملّيت طعنات الهوى والقساوه

يابنت ضمّيني ترى الهمّ ينزاح = واسقي فواد المعتني بالهداوه

من يوم ما شفتك وطير السعد لاح = وتبسّمت دنيا شقاي ابصخاوه

ماراح من عمري ولا شيّ ماراح = دامي لقيت ابجيّتك لي غلاوه

نسيت من لقياك شرّي والاشباح = نسيت في حضنك سنين الخزاوه

ارتاح قلب ٍ قبل جيّتك كم ناح = حسّيت طعم ٍ غير كلّه حلاوه

ان كان حظي قبل لقياك بي طاح = اليوم قام الحظ بعد العداوه

هاتي يدينك دام عطر الهوى فاح = وش عاد باقي ننتظر يانداوه

سلّمت قلب ٍ فيه ضبّه ومفتاح = بيديك ياكلّ الحلا والطراوه

بالله خلّيني على صدرك ارتاح = تعبت من طول السهر والشقاوه