الهم والحسره

[هاوي نجد]

اي والله حزين يانع الخاطر المكسور = من الضيقة اللي كونت فالحشا عبره
اجامل مع الايام تو العرب مسرور = يابلفيت كن النفس بالضحك مستره
فطن من فطن من ربعي وشار لي بالشور = تعالج قبل خلفً يجي وانت في غره
فقلت اكتم اللي شفت ولك علي انذور = على شان شورك الغلا بننا جره
وصف لي طبيب لقبوه البريفيسور = يقولون فاهم فالتشاخيص بالمره
وجيته ولاني سامح والهدف مخبور = صرف لي علاجً جعله الهم والحسره
علاجه خبيثً حطني فاهيً مسدور = وزود على مابي عسى ينحفر قبره
وقالو سنه لايمتكن فكته مجبور = وليا جيت بخليه زود علي شره
وهذا جزاء من يستمع في كلام العور = ماحسّب حسابه لين طبح معى الحفره
وشكواً على غير الولي ذلةً وثبور = نصايح زمانً حطت دروبها جره
وعيبً على الرجال يظهر خفا المستور = فتفرح بها ناسً من الغيظ محتره
الا خيرة الصدقان غمراً وفيّ شبور = صديقً معك وافي على الحلو والمره
شروا صديقي سيف تاج الوفا المنعور = كما الحد في يمناي ضيم الدهر طره
ياكثر صدقان الرخا فالرخا طابور = وليا كلحت الانياب كلً قصر شبره
ياسيف يامشكاي قدلي وانا ممرور = و خل الحمول بسرها من ورى الحره
سهيراً عقب ماجيت حتى بزوغ النور = من الهاجس اللي يشلع الجوف ويقرّه
ترى الوقت مهما زان لا تامنه بغدور = زمانً غريب يخلف العقل ويّفرّه
عسانا على الهقوه وعين الرجل ناظور = وياشين ظنً ماهقيته كما الجمره
ورد الخبر لمعدي الوافي المسطور = وخبره بللي صار وحفظ علي سره