تصدقيـــــــــيني !!

[فارس القوافي]

تصدّقيــــــــني ما ابــيك وما ابي قربك وابيك = وتصدّقين اني ابيك وما ابي بعدك وابيه

احترت يوم انّك بقربي ما ابي لمسة يديك = ابعد كما المجنون منّك واشتري البعد اشتريه

واحترت يومي في غيابك صرت انا اوله عليك = تبعثر التفكير فيني والعقل صاير سفيه

مهزوز كلّي في غيابك والحنايا ترتجيك = مشتاق لك شوق الصحاري للمطر لو تعرفيه

يابنت انا قلبي تعب ودّه من التعبه يجيك = ودّه يسولف عن غيابك وش حصل فيني وفيه

مقهور كيف البعد خلاّني من الشوق اشتهيك = وانتي من اوّل في يديني والوصل ما اشتهيه

واليوم لا والله احبّك والغلا منّك وفيك = ندمت في بعدك وحالي يشفق القاسي عليه

تعالي انعيد الليالي واللي يرحم والديك = واوعدك مادوّر لبعدك والوصل دوم ارتجيه

وتصدّقين اني ابيك وما ابي بعدك وابيك = وتصدّقين اني ببعدك دايما ً قربك ابيه