قبيلة السهول

[ناصر السهلي]

ملحمة الشاعر الكبير / خالد بن غنام العبيدي السهلي



ملحمه عباره عن 300 بيت






حار القدم والدمع فاض وحار=من شوفتي بايد رسوم الدار
نصيتها من يوم قلت حيلتي= ذكرى وانا مالي سوى التذكار
نصيتها من يوم طالت غصتي= مع قصتي والصدر كله نار
ادور آثار تعفت وانتهت =لوكان مامقصودي الاثار
سرى عليها كل مزن مظلم=تلعب بروقه به يمين يسار
لامن نشا عقب العشا ثم احتشى =خير وغشى دار الغضي بامطار
ابدى الدفين اللي كنين من السنين=وصار طين ولاعليه غبار
متلزب والمزن فوقه مرزم =وليا برق يلمع على الاحجار
للرعد بين طبوق مزنه حنة=حنة خلوج فجّعت بحوار
واصبح برده من السحابة كنه =لول نثر من كيسة البحار
امست له الوديان ترمي بالزبد=تجري بماها كنه الانهار
ماتترك اللي في الطريق تمره = صارت بحور سفنها الاشجار
رزق ليا جا الوسم بكر جيته = سبعة عوام تنبت الاثمار
وان زل وقته كن ماشي حصل=ولا اخضرّ جانبها ولاش صار
بدّل براد الوقت قيظ لاهب=وعاصوف صيف يتبعه معصار
وناب الزمان اركى عليها حده = وامست محول يابسات قفار
صيف محيف جاير متمادي = فيه السراب يخادع الانظار
وعدت عليه الشمس لين اذابته = سبعة عوام قيضها صهّار
صدت عنه عيني بعد ما استنكرت =ماصار فيه وطال الاستنكار
عدت النظر فيها ولولا شامخ =في جالها لا اقفي وانا محتار
هلت عيوني دمعها ويحق لع=يوني على ماشافت التعبار
والدمع مارجع حبيب ولانفع = قبلي حد الايعمي الابصار
سد الهوى مابيني وبين العرب =وامسيت ازيد الونة بتزفار
باح الكنين وبحت باسم منتقش=على مقر الحب والاسرار
ياليت خل كل هذا لاجله=يدري بقلب فيه طار طيار
عيني تشوفه مير كفي قاصر=دونه ولو ماني قصير اشبار
ابغاه بالمعروف ما ابغى جبرته=لاخير في شي يجي باجبار
با اصبر بصبر ايوب لو حزني حزن= يعقوب وانا عادتي صبار
وان مت من غبني وقلة حيلتي =الارض تاسعني ولي قبار
مانيب بدعة كم قتل قبلي هوى= دعج العيون اهل وفا واخيار
راحت سوالفهم تدور مع العرب = وعلومهم مضرب مثل واشعار
واليوم انا ثامن سنة في علتي = يارب تستر وانته الستار
وامرّ ماشفته وذوقني العنا =ماشفت بالاعيان وانا مار
رسوم دار مابقى منها سوى=هاك الاثافي في مشب النار
زين الدلع ماهوب داري عني = وروحي تغرغر منه للمظهار
وان ماحصل لي في حياتي شوفته =ان مت كيف ادري عن الزوار
اول سنة ياقرد حظي فيها = ظنيت في حظي وحظي بار
وثاني سنة حاولت اعوض مامضى=وفات الذي بيدي نهار جهار
واصبحت في الباقي ما غير ازاور=دار الغضي وابكي على الاعمار
يامل قلب مابقلى من صبره= قطرة لكن همومه الابحار
عز الله اني ماصبرت مخير =غصب على الشارب بدون خيار
ياشيب عيني وين ابالقى خلي = ماعاد به شوفه ولامسيار
قالو رجب والا صفر حروتهم = وافنتني الارجاب والاصفار
عزالله اني يوم اطاوع نفسي = اني ركبت من الشقا حدبار
واجهت ماواجه من الغرب العرب= من ظلم واستعباد واستعمار
العين تسهر كلما التم الدجى= ولدمعها من موقها انتثار
والقلب من حبه وهمه كنه = يصلاه صالي لاهب الاكيار
ياعين كم لك عن هواك بعيدة = عناك كفّر باقي الاوزار
حتى حلوم الليل ماساعفتك = تطفي لهب نار لها سجّار
مستقبلي كنت احسب انه منور=واثره ظلام ماعليه انوار
من سبة الحب العفيف اصبح علي =حمل عنيف وفوقها قنطار
هل شوفة عقب البطا والا عطا=لو حلم ليل بطيفه المرار
هل شربة عقب الظما او طعم ما=لو مرّ يمكن تروي الامرار
سر ياقلم واكتب معاناة لجت= وسط الحشا ولها به استقرار
كم ذقت طعم الموت من سكراتها= بغت تجنني وازور شهار
وانا بعيد عن الجنون وعاقل=ومن عزوة فيها الكرم والكار
ربعي السهول اهل المكارم والثنا=بيض الوجيه اهل الوفا الابرار
من نسل عامر عامر بن صعصعة=عامر وللمجد الرضي عمار
سادة هوازن والكتب تشهد لنا = من قيس بن عيلان بن نزار
من روس عدنان وهم عيال النبي =ابراهيم نعم الجد والاطهار
عامر بوقت الجاهلية ذكره= دونه تقاصر باقي الاذكار
نسيبهم سيد البشر نعم النسي=ب ونعم ثم ونعم بالاصهار
خذ منهم اللي سميت بام المسا=كين الطهورة زينبِ باقرار
والثانية ميمونة الميمونة= الام خالة سيد الاحبار
هي خالة الحبر بن عباس الذي= مايبغضه كود اكفر الكفار
وحنا خوال بن الوليد الاول= راس الشجاعة فارس مغوار
ومنا لبيد الشاعر المخضرم= والنابغة عمالق الشعار
ومنا المحدث مسلم اللي يعرف = اللي خذت علمه هل الاقطار
صحيح مسلم كل مسلم يعرفه = اللي روى الحديث والاثار
-سادة هوازن فالزمان الاول= قبيلة تشهر كرمها اشهار
سبعة قبايل عامرية واكثر= ماحد يناطح جيشها الجرار
واذكارهم تملا الجزيرة كلها= وتمشي بطيب وعز فالاقطار
سبعة قبايل واكبر جموع العرب= جموعهم ماهم بخمس انفار
في الشعر وجزال الخطب والحرب واك= رام الضيوف ان حل كل صرار
بيوتهم وقت القسا ظليلة = يزبن على اهلها الضعيف الفارّ
فيها الحجا ركن حصين راسي = ماهي على ماقيل جرف هار
منا افرس الفرسان فارس قرزل = اللي على كبود العرب مسمار
وملاعب الاسنة اللي مشتهر = لاهاز قوم ولت الادبار
والاحوص وخالد مع عويمر عدي = ماهي سوالف كاذب مهذار
وبن الطفيل اللي يسمى عامر = ماله ضديد وفاللقا كرار
وعمر بن ود وقصته مشهورة = يكفي فخر شاهد له المختار
نبذة عن الفرسان ولو با اعدهم = شيبت قبل اصل عشر معشار
واشهر معاركهم على شعب جبلة = يوم العدو يفرض عليه حصار
يوم العرب من كل دار وديرة = جتها بزخرة جيشها الدفّار
والله نصرهم وانسحق عدوهم = واقفو لهم عقب الهدير جغار
سادة تميم مصفدة بقيودها = عنك انهم ما ارضتهم الاقدار
وفي رحرحان الموت طق خيامه = يوم به الفارس كما الجزار
وحنا غلبنا قريش مع كنانة = قد سميت في حربها الفجّار
وايام تذكر غيرها خذ منها = في يوم فيف الريح والنسار
ذكرت نبذة والمعارك واجد = ماتحتملها الكتب والاسطار
اجدادنا سادات سادات العرب = والكتب تروي عنهم الاخبار
وحنا بني سهل وحنا نسلهم = كل على نيل المكارم حارّ
يجري الكرم فعروقنا من طيبنا = ورث من الاجداد وكسب قارّ
ترثة سهل يالايمي في مدحهم = مانيب اطيع الحاسد الثرثار
احسد ولم ماحد يلد لك النظر = وان غرت كم قبلك حسود غار
والله لامدحهم واعد افعالهم = واللي يضيق يدور ادنى جدار
حنا السهول اللي تعرف علومنا = اهل البلاد البدو والحضار
حنا السهول اللي تزوم جموعنا = نكسر بها شوكة مغير غار
حنا السهول اللي حمينا دارنا = باعمارنا لو الزمن دوار
حنا السهول اللي ليا جتنا النذر = ندقم شباة الصارم البتار
حنا السهول اللي نعز ضيوفنا= على سمان الحيل للخطار
لاقامت ام الورع تبخل دونه = بالزاد قدمناه بالمعذار
حنا السهول اللي لنا بأمجادنا=وسلومنا وعلومنا منار
اللي يريد السلم نكرم لحيته = ماله يكود الطيب والوقار
واللي يريد الحرب نلعن كوثره = ماله يكود يداس بالبسطار
كم خفرة منا تشق ثيابها = ما ابقو لها حي يجيب الثار
ما اكثر علوم الحق لو اذكرها = ما احد حصاها والفعول كثار
ذباحة الترك اسمهم من فعلهم = في الترك في مجزل على الخبار
تاريخ نجد لبن بشر قد عدهم = تسعين فارس رورحو دمار
واللي بقا سالم عطا الخريمة = ودرى ان مابديارنا قرار
مقدين ياربعي بصهبان اللحى = اللي عفرتوها على العفار
الله يرحم من توفى منكم = واللي من الترك هلكو في النار
ويم العفيرة صار للترك رهجة = لكن حباريهم لقت حرار
لاشك دون الغيل غول حلوقهم = وزرق العيون يصيبهن صفار
لليوم خاشعة رسوم قبورهم = من جا حذفها حذفة الج
وعند العويند عاندو مير اعقبو= وارض العرب ماهي لهم عقار
ويوم على بنبان حشنا خيره =وشره بقا من قسمة الاشرار
وفي يوم حدبا قذلة لنا عز = غيب تحته الكوكب السيار
ويوم الحنية تعرف الدواسر =وش صاير فيها ووش ماصار
ويوم المحيجر يوم شبت ناره = ماعاد به مهرب ولامجحار
ويوم الدلم رف العلم باطرافه = وش قال فيه الشاعر البيطار
وعند البويبة مع بن لامي = وامير رخمانه لهم معثار
عقب اخذو من جنادرية ذودنا = لحقو الرجال بعجلة المثار
وفي يوم كنزان حضر في هوله = فرسان ميدان وحرار اوكار
وتشهد لنا الدوشان في فعل محلف = يوم احتمينا حسكة الاوبار
وفي روضة مهنا الخيول تعنا= والذل راس العار والشنار
والسر قدجينا عليه مع عنزة=والموت له مارد بلا مصدار
وعلى العويند قد تلاقينابهم = ولابنا ولابهم خوار
امسو وعلط رماحنا بجنوبهم = مثل القلم لاركز في الفرجار
وحنا حمينا زعب من دون الشريف = يطرد وراهم في رجا المهار
لين انثنى عقب الطماعة عايف = ويرصد طلايعنا مع الرادار
وش قال فيها ماجد القباني = يوم الحوافر تقدح الشرار
ويوم الرويضة ضالو ابنا زايد = مير احتمينا الذود والابار
ومطير جونا في الرويضة لكن = ماحصلو درهم ولادينار
وجونا بها العجمان لكن ردهم = ضرب تزلزل له جبل سنجار
ويوم على يام فرقنا جمعهم = في جنادرية والطوال قصار
سبعة بيارق برقها يعمي البصر = كالسيل لاروح بواد نمار
اقفو ولا احد عن خويه ينشد = يوم السبوق يبين فالمضمار
والخرج قد خذنا الفضول وجمعهم = فوقه ولاخفنا من الثوار
كم هية في الخرج حنا هلها = بقت لنا في الكتب والاسطار
وكم هية صارت على الحيسية = وكم من مناخ فوقها ومغار
وفي المستوي مايستوي فعل بلا = برهان واللولو من المحار
ورماح ردينا العدا عن ذودنا = فيها وقد جونا ثلاث امرار
والانجل اللي تعرف الناس امرها = امسى العدو فيها قصير هجار
وعروا نموت بها على الكرامة = ناطا المنايا ماندوس العار
والحرملية كم مناخ عدته = مناصرين مرة وانصار
وايضا حمينا يام دون بن سعود = بسيوفنا والمستجير مجار
وجينا على الحيسية بموقعة = قشرا بعد ماعمست الاشوار
وفي يوم ركبة هي وحزم الراقي= نفتك بالاعدا فتكة التتار
ويم الجمانية يورخ يومها = ضديدنا يرجع بصك اعسار
وفي هية الابيض على شمر لنا = ضرب يخلي خصمنا ينهار
ولنا مع العجمان في عرجه وعد = تممه من هو للكسر جبار
ويوم السماوة قد ذبحنا شيخهم = مطلق ولو مثله ماهوب يدار
ويوم الرضيمة كاشفين ضيمه= نشري الشقا لاغليت الاسعار
ويو السبية مايذكر زية = ننصى الحريب ونقطع المشوار
وعلى طلال لنا فعول تذكر= والحق مايستر عليه ستار
وسدير مع هلها نطيع قضاتنا = وقضاتنا الاسياف في المحضار
والوشم مثل الوشم فيه فعولنا = لو الزمن بعدين دار وجار
وجراب ماسيف بقا بجرابه = ياعنك ماغير الله القهار
ويوم القويعية تناغق بومه= لكن حشر منا العدا حشار
وفي وقعة الوفرا اشتركنا كلنا = ولابنا باير ولاجوار
ويوم الصبيحية بعدها صبحت = خيل العدا وامست على الزبار
وفي ملح ثار الملح والبارود به = فيها العدو علق على الشنكار
وفي هية الطبعة طعام الضبعة = تشبع بها عواية الاسحار
وفي وقعة المنسف مع بن تركي = على مطير ومن حضر مانار
وداورد ريح الموت فيها هبت = كل من النخوة تقل به زار
وفي يوم جودة فتنتة معهودة = والكل مهدر دم عربه اهدار
والمعتلى والبرة وفي الحرة = ماحد يرد بعيرنا الهدار
وشقرا لنا مع من سكنها قصة = ماسورتهم دوننا الاسوار
ويوم القطيف به اقتطفنا زمرة = زمرة ردا تمشي ورا زمار
وفي يوم جزعة يوم الانفس جزعة = جينا مع الفزعة ولانحتار
ويوم الصريف مصرفين خصمنا = كم حفرة وقع بها الحفار
وفي يوم ابوخيالة الخيالة = من فوق قحص مهارها الضمّار
وفي يوم جثجاثية لنا وقعة =تسوجر ابواب الرد سوجار
وبن رشيد اللي تهيل جموعه = ماله علينا ميل مهما صار
ولنا معه يوم دهنا مايجهل = وبيوم بنبان بنصر سارّ
وفي وقعة الرمحية المشهورة = تسعر بها النار ونزيد سعار
وفي وقعة عنيزة ذكرنا ميزة = مانجضر ولانرحم الجضار
والبدع ماهو بدعة من فعلنا = يوم اغتشى لون السما حمار
ويوم طرفية كم تركنا فيّة = وطرباتنا شوف الخيول تكارّ
وقدام فيها فعولنا القدايم = يضيع في جرح العدا المسبار
يوم الطريح يصيح ما احد شاله = ولا على جرحه يحط غيار
ويوم تربة تربت وجيه اضدادنا = نملى من جثثهم خبب وجفار
ويوم سبلة ما ادراك مايوم سبلة = ذكره وصل بغداد والانبار
لنا بها فعل مسجل بالكتب = ماهي علوم مقلب الاطوار
وايضا على القاعية لنا ضرب = ضيق على الي هجو المعبار
وام رضمة فيها ويم الشوكي = ليت العدو من دونها استخار
وفي روضة المذبح على الدعجاني =يوم احتمينا حقنا نهار
وعيدة حضرنا العيد والعيدية = كسر الدويش وقطفة النوار
والخفس ومبايض يقول الشاعر = منها يكفي عجة وقتار
وفي جولبن وايا سلام جينا = بكل غمر خايض الغمار
والحرملية والحفر مكرورة = يوم المعاند جا يطق الطار
غير البكيرية وغير عشيرة= ماننثني لمجامل الغدار
افعالنا مذكورة مشهورة = ما انّا برجوى مدحة العهّار
في نجد عشر قرون او زيادة = راضين في صفوه وفي الاكدار
نضرب بحد السيف وندوس الخطر = لنا النصر ولضدنا الثبار
يوم لنا ويوم علينا مابه = للناس حقران ولا استكبار
صوارم سيوف لها بايماننا = صوم على روس العدا وافطار
تشفع بهم مرٍّ ومرٍّ موترة=والموت بين الشفع والأوتار
متكاتفين تحت راي واحد = ولاتغير وحدة المسار
يوم الخبول اية خبل يخلفهم = كالسوس في غصون الشجر نخّار
ومن اوسط الصمان حتى العارض = والغيل وماحوله خلا وديار
وفي غيرها والموت دون ديرنا = من دونها كل الكبار صغار
ليا كشف برق تبعنا نوره = ببكارنا نرعى بها المخضار
نرعى الخطر وسيوفنا مسلولة =واذوادنا مخضرّة الازوار
مخضبين سيوفنا من ضربنا = في ضدنا وبكل ثقة واصرار
مانخشر ولانختشر في ديرنا=حيث الدير ماتقبل المخشار
واعدادنا عشرة فخوذ وافية = المجد فيها والكرم شعار
عيال شماس مع المشاعبة = جبال نارية ماهي فخّار
والاد شماس يعدون اربعة = من طيبهم تستنشق الازهار
منهم دوى المغلوث برازية = عليهم بكل المديح يشار
ومنهم الظهران يامااطيبهم = لضد العدا والضيف والقصّار
والاد قبان مقابيس الوغى = وان ثارت البندق بغير عيار
والا محلف وقت التلف جزامة = ماتنفهق لاجا الفشق مدرار
واما بني مشعب فست فخوذهم = من شافهم مع كل فج ذار
ربع بن جلعود الكرام اهل الثنا = وجيههم بيض كما الاقمار
بالعز يحمون الدبايل وان لجا = مضهود قامو معه ماش اعذار
ومناجلة ماحد وصل ميصالهم = مزبان من حده زمنه وجار
ومنهم محانية بعاد عن الردا = من ضربهم عظم الخصيم كسار
ولاد العبيدي ماتمل ضيوفها = وسيوفها بالدم لهن قطار
وصعوب اكرام وريف لضيفهم = كنه فابا الخصيب والعشّار
ومنهم زقاعين لهم كل الثنا=ولمن حربهم جمعهم دحّار
ومنا من الفرسان اعاجيب العرب= لاردو الهارب عن الفرار
منهم خزيم ولد لحيان الذي = مضرابه بخصمه على الفقار
فرس عمير الطيبة قلعها = وحسبت على عسّافها مخسار
يشهد على ماقوله بن هادي = شيخ قحطان وطيب الميكار
يقول له حولت عنها راضي = ماعاد تلحق فاتك القطار
وعرهان بن باتل كعام العايل= تخاف من سيفه هل الاغوار
والاخر مهنا ولا احد يجهله = زبن الضعيف الخايف المذعار
وعلي بن جودة من بيجحد جوده = وفعله لاحزّ المعصم السوار
واذكر جليدان وكلام حوله = وصفه بن رشيد بافتخار
وعثفر بن رويضان وايا شايع = لاساقو العدوان سوق عشار
وعلي بن طريخم وذعذاع اللي = من هازهم في حكم الانتحار
وشعف ولد سجوان وبن معدل = فرسان وابطال مضو بادوار
ورغوان ومشنان لهم هيباتهم =لامنهم ركبو على الاكوار
وحقلان ال عريج وبن السودا = على مداغيش العيال جسار
وهباس ولد عبيد وهادي بن ثقل = نطاحة الغارت باقتدار
وشري وبن زليغيف وبن دويحس = حريبهم ماحوله انتصار
وضويحي بن خزيم ولايجهل = لاجا المجوخ كن فيه سكار
وانا لو ابا اعدهم ما ابدهم = لكن غيض من بحور غزار
ومنا منادي بالعشا لضيوفه = يقدم الترحيب بابتدار
سلطان بن ذيب الذي نفخر = يشهد له التاريح فالاسطار
ومعشي العوشق بطيبه مثله = طيبه ومثله مايبي اختبار
مجلس كريم الاصل زين السيرة=ماهوب يخلى دلة ووجار
والشيخ بن جلعود مكرم ضيفه = في ضفه لمن جاه رزق دارّ
والشيخ بن ريحان وبن قعية = ماهم بنخل يابس الجمّار
حنا السهول ولاجهلنا جاهل = واقول مايشوي الصقر صقار
حنا هل الطالات غصب بلا رضى= لاشبهرت عدواننا شبهار
اضدادنا مايمرحون بعافية = والضيف له دلة كرم وبهار
هذا بعض بعض مزايا ربعي= ولو باستمر أتعبت الاستمرار
اقولها واللي رضا فله الرضى = وحتيش لو اللاش دمه فار
ماقلتها ابغى من وراها حاجة = مانيب من عبادة الدولار
ولا اقبل عليها نقدة من هافي =وانا علي ماتلعب الشطار
يفرح بمدح الطيبين الطيب = والشعر حر ولابه احتكار
ويضيق من مدح القروم اهل الردا = واهل الحسد حلابة الابقار
ترى ضعيف النفس يترك دينه = ويعوشر مع الرافضة عوشار
رايه مصادر كل يوم بشلة = غصنه ضعيف مع الهوى مهصار
متلوث من كل علم وعالم = عود سوات كناسة العطار
يالابتي هذي حميا دونكم = من حبكم قلبي على مجمار
نظمتها فيكم بيوت جزلة = تفيض عفوية بلا استحضار
ترمي جواهرها من كنوز الحشا = بذل ما ادور خلفه استثمار
مدحي لربعي طيب ماهو مصلحة = واللي يشكك به تراه حمار
لايحسب اني مثل منهو خابر = ماني كما الطرطور والطرار
اللي يلاحظ نقص لايبخل به= ويقدم الملحوظ باستفسار
صح بدنك ياللي تصح لساني = وياحاسدي خلك ورا المقطار
مالك علي فضل ولالك منة = خذها على ماقيل باختصار
ما احد يرد الشمس دون شروقها = لوبعدها عن يده خمس امتار
بعض العرب خيره يروح لغيره = مخلوعة يادرفة النجار
وماني من اللي يمغطون حلوقهم = ما من فعول وبالحكي تجار
عاشو على ذم الرجال الوافية = لو انهم على الشمال اصفار
ولايجحد الوافي يكود الهافي = يوم انه انجس واخبث من الفار
ماعشت في الدنيا من اطراف العرب = مثل البليد الهابي المفغار
شاعر واعرف العلم واحمى ماقفي = مانيب اضيرها لغير ضيار
واللي يبي سوق الاوادم كلهم = يطر جيبه من زمانه طارّ
ومنهو تقدم ماتندم لكن = يصبر على سقي الثرى البذار
راع الحسد لاشك ماطاوعته = ومن الذرور بحجر عينه ذارّ
لمن حربني حربة في نحره = وانا لمن هو برّ فيني بارّ
قال المثل ياللي تعرفون المثل =ان كنت ريح فواجهك معصار
اللاش لاندي ولاهو همي = ماله مخاليب ولاش اظفار
ولايستوي قصر عزاز حصونه = مع بيت من الطين سقفه خارّ
ولايستوي بالخايبين الطيب = والله ولا المسجد سوات البار
ويانار ياللي ساقني سناها = وانا لحالي مذهب ودوّار
امشي وانا حافي على رجلي لها = للي على جمر السمر سمّار
القا عليك العلم والا اولّي = والنار تصلى الضامر المحشار
عن صاحب كن القمر في جبهته = او لبته لافتح عنها زرار
والا العيون الواسعة في وصفها = ماللشعر قدرة ولامقدار
تشوف ظل رموشها في عيونها = وحجاجها من فوقها مندار
كن المياسم في الفواد تبرّد =لاحمّيت في نار بن عمار
قضّت ظلام الليل فوق متونها = واصبح على رجلي سببها حيار
لاوالله الا راح عمري حظها = واثر الذي ماهوب ينفع ضارّ
رحنا سبايب نجلها في رجلها = والقلب كنه مطلي بالقار
طوعت عاصي القاف لاجل عيونها = وقضيت كل العمر في انتظار
هذي نهاية قصتي مع غصتي = راحت حياتي في هدم واعمار
يالابتي لاتذخرون الفزعة = وانا بكم مستبشر استبشار
تمت وصلى الله على محمد= عداد ماهلت من الامطار
وعداد ما ارمشت العيون وما خفقت =كل القلوب وغنت الاطيار
والناس تدري ماش به طيارة = تقطع محيط ولابها طيار
الاولة والثانية مني لهم =والاولة هي عندي المعيار
والذيب يدري مايغره علمي= من غيره اللي لا اهتوى صخار
والخير في الثنتين والله الولي= ختمت بليل والنجوم ازهار
ولاتلومون الفجيع ان غنى= من شوفته بايد رسوم الدار