في حفل ترشيح المزايين

[الطائر المهاجر]

في حفل ترشيح النياق المزايين = اصطفن الزينات من كل ديره
في مسرح ضيوفه الوف البعارين = وفي مسرحيه واضحه للبصيره
ومحكّمين من ثلاثه وثنتين = وملقنٍ يرسل نصوصٍ قصيره
وخلف الستاره من لعب بالقوانين= ومن فوقهم رادار يدري المسيره
وبدا الحفل في سجع هرش المذيعين= والطبل والمزمار تعلن نفيره
وتقدمت بكره تمشى على هوين = وتستعرض الافخاذ واللي تديره
فيها الحلا والزين مدبول ضعفين= بين الشفايف والرموش الخطيره
وفيها الرشاقه والحور ميز العين = والشعر الاشقر والردوف الكبيره
ومن بعدها وحده هزيله من سنين = جربا وعرجا والشعر تقل عيره
ومن بعدها اخرى طويلة كراعين = من شافها ماشاف شيٍ يثيره
ومن بعدهن الف والف والفين= حتى اكتمل عقد النياق الأسيره
وعند النتيجه بان قلب الموازين = وفازت به الجربا ولو هي كسيره
ونشرت صورها في جميع الميادين= وكل يهني فوزها ف المسيره
قلنا نقابلها ونسأل سؤالين = وشلون صارت بالترشح جديره
قالت تبون الحق من غير تلوين = الله يخلي ولد خال المديره
يوم انتخت امي بها قبل عامين = قالت ولا يهمك ولو هي غريره
وفي حفل دولي من جميع البلادين = راحت تمثل للنياق وسفيره
وتطرد من الحفله وكان العذر شين= نخاف تعدي للنياق الكثيره