منتديات الفطاحله

منتديات الفطاحله (http://www.ftahilah.com/index.php)
-   محاورات ومسابقات الفطاحله (http://www.ftahilah.com/forumdisplay.php?f=410)
-   -   مجارة شعراء تعبر عما فيها (http://www.ftahilah.com/showthread.php?t=174320)

الطامي 14-05-2020 01:06 PM

مجارة شعراء تعبر عما فيها
 
ياجماعه والله مالي بكثار العذار
ماقصرت الرجل منكم لشي ٍ من لامور

ارفعوا مني القلم دامها حجر وحضار
واعذروني بعض لامرار لو ريتوا قصور

سببت لاوضاع لي ضيقة ٍ تالي النهار
خصّ به مع طيحة الشمس قدام الفطور

ضايق ٍ بالي ولالي على الدوجة شنار
وشايم ٍ م البيت شوم الحرار من الوكور

سكروا لابواب من دونّا حتى المطار
ليت حن نقوى نتعلق بجنحان الطيور

راشد بن حمد ( العارض )

////////////////////////////////////////////////

العذر مقبول للي لهم قدر وقار
وانت حالك حال غيرك مقدر ومعذور

مالنا غير التصبر وتنفيذ القرار
لين ربي يرفع السو من كل محجور

لاتحاول نفذ الأمر ماحولك فرار
قولة اقلط ارحب ارحب تراها ماتدور

مبارك محمد ال مبارك
///////////////////////////////////////////
انتبه يا صاحب العلم من رصد الرادار
التزم حسب القوانين وأرشاد المرور

مثل ما قال الزلامي ياطول الانتظار
والحجر بيح خفا الي على الدنيا صبور

كل مما تشتكي منه يا راشد أمجار
والفرج في مقبالات الليالي وشهور

الخلاوي

///////////////////////////////////////////

نمتثل لامر الحكومه ولإطوال العمار
ومايجي عقب العسر كون فرحات وسرور

ويالله بغيثً سماوي وتجلى ذالغبار
تنجلي غيمة كرونا وهمً فالصدور

وجعل يسقى لاشعرنا مواشير العمار
مع سليت وصوب محسن وممشانا عبور

سالم بن طالب الصعيدي

///////////////////////////////////////////

هاظني ماهيظ الحر الاشقر الطيار
وماتعلى مستوى الغيم ياكون الصقور

اشهد ان بعظ المثايل اتزيد النار نار
ولا يغطي النور رجلً يشوف النور نور

والفلك دوار لاشك مادري كيف دار
والمرض شي من الله وللمسلم طهور

وضيقةً في الصدر بين الحنايا والزرار
ليتها ضيفً يكرم على قل مخسور

راشد بن محسن ( الهلالي )

/////////////////////////////////////////////
هاضني قاف تجاروه شعار كبار
كل منهم في مجال الشعر خبره ودور

تشتكي من جور وقت علينا يوم جار
ياعسى مقبلة الأيام تأتي بالسرور

طالت المده ولاشيف جار زار جار
عقب تسياره قعد بين جدرانه يدور

ياعسى الله يفرج الهم ويزيح الستار
وترجع الدعوى القديمة ويسمح بالعبور

ونسهج القيعان مع ويل ولا فوق قار
ونطلق أبها الشوف من عقب ماكان محكور

حمد بن سالم الضعيف ( مهلي )

//////////////////////////////////////

ويش با سوي وباقول ولي سار سار
ودي اجاري المنا عير وطوال الشبور

بس اناعقب الظهر والربع شبة نهار
ومن بغا صيد الجوازي يعجل بل بكور

اشعفوني مثل مايشعف البدو الخضار
يوم شافو جدت النبت من عقب الدهور

تكره النفس الجهوله بعض لشيا جهار
والله الي يعطي الخير للعبد الشكور

كل شي طال والطول تاليه انحدار
مثل من يرقا المشاريف يرجع للحدور

جابر بن سعد الكخان (((عنتر)))

||||||||||||||||||||||||||||||||||||||||

كنكم اللي زوّد البن من كيف البهار
وقرّب الدلّه من الجمر يبغي قد تفور

اصبري يادلة الكيف في وسط الوجار
عزبة المطراش ماعاد حان الها ظهور

اصبري شروات طيرٍ على شبّة حرار
تصبر الجنحان فالقاع لوهي في طيور

حمد بن محمد الفطيس (النداوي)

||||||||||||||||||||||||||||||||||||||||||

هاضني صوت النداوى مع خبرة حرار
والشعر معهم كرامه وداعي للسرور

ضيقت بي ضيقة الربع وارخيت الزرار
صوروا الضيقة وثرها بصكات الصدور

بالمكارم كل منهم توشح له شعار
كل ابوهم بالمراجل معتّق ومخبور

مانفعني يوم حاولت تجنيب المسار
رسمهم جبرني اكتب على نفس الشعور

محمد بن مرسل ال فطيس
||||||||||||||||||||||||||||||||||||||||||

هاضني قاف لفاني كما لولو محار
من نوادر كل منعور وافين الشبور

وِزاع قلبٍ كل ماقلت هيّد زيد طار
لو ماهو وسط المحاني خطير انه ينور

مانفعت في الدخاتر ولا أشعة سونار
وين يصحى الجسم ويطيب والقلب مخطور

والحجر زوّد على القلب تكثير الخطار
الله اعلم وش بقا من العمر قبل القبور

يالله انك تبدل الحال بفُلك لأستدار
والحجر فكوه والعلم الاخر له مرور

والله ان قدنا هوايا لكن مابه خَيَار
والروابع تِدّحِم وكل زورٍ فيه شورٍ

منصور المري ( الطامي )
||||||||||||||||||||||||||||||||||||||||||
القوافي بعض الاحيان لاجاتك اقصار
اكثر الناس اتحفظها على مر العصور

اسبقوني وقطفوها مثل قطف الثمار
والمعاني صيد قفر ٍ تبين لسبور

مايصيده غير صقر ٍ يعلقها اطيار
عند حسن الظن ويزيد فوقه مايبور

واعتذار العارض مقدر ٍ قدر الجوار
والنصيحه يلزم لمنزله والراي شور

ويطلب الله كل ماضاق صدره واستثار
ولايطوف دعوة الفطر واطراف السحور

(( الجدي ))
||||||||||||||||||||||||||||||||||||||||||
هاضني قاف خذيته على عين اعتبار
من شواعير لحنهم تلين به الصخور

ودي اصبر واتريح لاشك الدم فار
كيف باصبر والتماثيل معطتني نحور

ياهجوس الشعر هيا ترا مالش مدار
روحوا قبل امس وانا مع وجه السحور

ودي اجاري مثايل طويلين العمار
من غزير العيلم اللي مجمه ما يغور

وان بغيت اصخر اللعب بطلت الزرار
عارف نفسي ولانيب طفق ومغرور

يا سلام الله عليهم مثل فجر النهار
له عبير المسك والكاد والعنبر بخور

سالم بن جابر المشعاب

الطائر المهاجر 14-05-2020 02:47 PM

رد: مجارة شعراء تعبر عما فيها
 
صحت السنتكم
والشكوى على الله الحجر ولا الكرونا
ابعدها الله عنا جميعا

منيع 14-05-2020 05:11 PM

رد: مجارة شعراء تعبر عما فيها
 
مجارات ولا اروع
شكرا لك يابومحمد على اتحافنا بها
وشدة وتزول بعون الله
نحياتي

الطامي 15-05-2020 04:10 AM

رد: مجارة شعراء تعبر عما فيها
 
الطائر
والله امين
صح بدنك
وشكرا لك لمرورك
لاهنت

الطامي 15-05-2020 04:10 AM

رد: مجارة شعراء تعبر عما فيها
 
منيع
والله امين
صح بدنك
وشكرا لك لمرورك
لاهنت

داعي الشوق 15-05-2020 10:59 AM

رد: مجارة شعراء تعبر عما فيها
 
مبدعين
شعار كبار وجزاله
صح لسانك

الطامي 20-05-2020 02:13 AM

رد: مجارة شعراء تعبر عما فيها
 
هلا بو سعد
صح بدنك
وما عليكم زود ياخوك
لاهنت على المرور والتعبير الطيب


الساعة الآن 10:33 PM.

Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لمنتديات الفطاحلة