منتديات الفطاحله - ابتدي بعادة الاسلام واهلّ السلام ..

[size="5"][align=center]السلام عليكم ورحمة الله وبركاته
بسم الله الرحمن الرحيم

هاذي المشاركة الثانية والقصيدة الثانية لي بالمنتدى والله يجملنا[/size]

[size="4"][color="navy"][font="arial"]ابتدي بـعـادة الاســلام واهـلّ الســــلام
ولـعـنـة فـي شـيـاطـيـن تطول قرونهـا

مرحبا ترحيبة عد السحـايـب والـغـمـام
وعــد ما نـــادى المنادي لقديم ركونهـا

دار بيشة هل العزوة وسـيـوفٍ حـســام
ظربة الظارب الا من حاشها مجنونهـا

الصـناديد المجاهيم الطنايخ الســـطـــام
الاطــالس العمالس شـيـدات حصونهـا

حبها في دم قلبي داخل وســـط العـظـام
لو يشيب الراس فيني ماقضيت ديونها

ودار نجد هل الـطالـه وسيـود الـجـهـام
الـغـنـاديـر الـمـغـاتـيـر ماليات بطونهـا

مـولـد الـتـاريـخ مـنـهـا لـذيـابـة الامــام
يـوم نـيـران الجهـل متزامـلات متونها

فز فزّة الـعــابس من بعد شــد الحـــزام
بــاد روس يوم جابت للعرب طاعونها

بكلمة التوحيد فوق المجلّي بالســــهـــام
ثار بركان الشهادة والشـجـاعـة دونـهـا

وحّد جموع تخاوت سوا سرب للحمــام
لين صارت مملكه وكــل البشر ياتونها

دق رجلك يا جهيّم دق رجلك يا جهـــام
والوعد في ليلة عصف عصايف لونهـا

المصمّم والصمصامه والمهنّد والقضـام
والصفيحة والخشيّب خزّقـــات عيونها

ياصغر ريش الحمامه جنب ريش للنعام
ركبـــوا وجيه السحابه والابل يرعونها

الفهم للي عـلـوم الامس عـنـده كالــوسام
مانسى مجد القبايل لا هـجـر مضمونها

وانا عبدالله ولد محسن وشعري مايســام
افــرد المعنى على نوق تدر بـلـبـونـهـا

لو غزى حرفي دسّــــم الشوارب الدسام
والقصايد عند كـــــل واحدٍ يفرق لونها

ماسك طيب الفعايل كـمـا مسكي لـلـجـام
وحـبـي لـلـديـرة اللي رابيات غصونها

لو يسيـل الدم مني لـجـلـهـا ماهي تــلام
تـفـدى بالأرواح فــدوة غـالـيـة بعونـها

لو على كيفي كتبت الـشعــر بألفين عام
ولا وفت اشــواق قلبي حبها وشجونهـا

والسـلامـة بالبـدايـة والسـلامـة بالختــام
ومن يبدي كلمته عند الرجال يصونهـا[/align][/font][/color][/size]

[center][size="4"][font="arial"]وهاذي بعض معاني الكلمات للي يجهلها ولو انكم فحول ان شاء الله ولنتم بحاجة توضيح
لكن الزيادة بالخير ما تضر ..

[color="darkred"]الصناديد[/color] / جمع صنديد وهو الرجل الشجاع

[color="darkred"]المجاهيم[/color] / وهي اجود واثمن انواع الابل واكثرها ادرار للحليب ويأتي لونها غالبا بالاسود
ومنها فصايل اخرى

[color="darkred"]الطنايخ[/color] / مأخوذه من مطنوخ وهو الرجل الصلب وقيل سعيد الحظ وقيل الونيس والمعنى هنا الرجل الشهم

[color="darkred"]السطام[/color] / نفس المعنى لصنديد

[color="darkred"]الاطالس[/color] / جمع الاطلس وهو من اسماء الذيب
[color="darkred"]العمالس[/color] / جمع العملس وهو ايضا من اسماء الذيب

[size="4"][font="arial"][color="darkred"]المجلّي[/color] / نوع من انواع الخيل السبوقه وهو اولها واسرعها[/font][/size]

[color="darkred"]المصمّم والصمصامه والمهنّد والقضـام والصفيحة والخشيّب[/color] / كلها اسماء لانواع السيوف[/font][/size][/center]