يشهد الله يشهد الله مامعك حيٍ بذيّه= خافقٍ عن غيرك ابدا عيفةٍ واظْهر نفاير
صاحبي يانور عينٍ عن نظرغيرك غضيّه= ماسواك اللي نزلها لا ولا غيرك تخاير
هيه واللي بك فتنّي ماسواك الْي الهويّه= ولا لي بغيرك مرام وفيك فرْحي والبشاير
يابعد قلب المعنّا خِطّي بصكّ وهويّه= إني اللي فيك مغرم واني اللي جيت طاير
إيه جيتك من هيامٍ حلّ اقاصيّ الخفيّه=من زمانٍ له تسيّد وانْعمت منه البصاير
هيه ماشافت لغيرك بين خفرات البريّه= واحْكمت ماغيرك اللي للكسِر صدق الجباير
روح روحي بعْد حيّي نفتي بذِيّي وهيّه= وصرتي الاولى ولا مثلك فضتْ لاجله سراير
ياهوايا يامرامي يابعد من لي دنيّه= ارسميها غير حبّك مانزلْ باقصى الضّماير
واكتبيها في دواوين الغلا مالك لديّه= لنّك اللي نوّختني وان خفتْ سقت العباير
يالهويّه يالغضيّه يالعذيّه يالوفيّه= إخْذي بحسبانك اني دون وصْلك صرت باير