يابنت اعرف الدموع اللي على شاني = واعرف دمعن على غيري تهلينه
كبرت على سوالف خرس الاعياني = ولاعادت الكتب تغريني عناوينه
كل الميادين له خيلن وفرساني = ومبدا الكرامه هوى نفسي ميادينه
دشيت سوق الصداقه بين عدواني = ولقيت نفسي كفو وانتي تعرفينه
العود وش قيمته من دون دخاني = والعلم لولا الجهل ضاعت موازينه
والورد وش خانته لاصار ذبلاني= ماعاد ينفع ولو كثرت بساتينه
الجرح ينزف ويتعب نبض شرياني = وانتي بصدك تزيدنه وتكوينه
علمتك الحب وش يعني وعنّاني= وشرحت لك درس ماظنيت تنسينه
السالفة مالها يابنت عنواني = عنوانها حرف يكتب لك وتقرينه
نور القمر عند ضو الشمس خجلاني = بس القهر نجمتن غابت تنادينه
عاش السمك بالبحر ماشاف الامزاني= والبدو تسأل عن الطشة على حينه
دمع اليتيم انجرح به خد واوجاني = وغيره على سلة الحلوى دمع عينه
يابنت مايفرق المظلوم والجاني = هذاك يبكي وهذا سن سكّينه
ماجيتك اشكي هموم القلب واحزاني = حشى ولاهمني دمعن تهلينه
عرفت مغزى صديقي قبل عدواني = وعرفت نفسي كفو وانتي تعرفينه