الأجر واصل والنوايا سليمه = والشرع وصانا على سابع الجار
عادت حليمه للأمور القديمه =وبيت الفقر يصبر على طفية النار
ياهيه غبر فوق قرنك وديمه = وارفس برجلك كود تظهر لنا قار
من كان يشكي من تفاحل وريمه = يضرب براسه كل صوان وجدار
هذا دواء لاهل القلوب السقيمه = وان زاد زدناها بوزنٍ ومقدار
اقطعش يانفس تحب الظليمه = واقطعك يافِكر من الغير يندار
ياهيه ياللي تحترق وسط خيمه = مغلقه الاطراف كنك على وجار
سمنٍ على كبدي الأمور العتيمه = لاجات لك او جبتها كنك بزار
ومادام حنا ماعملنا جريمه = موت الافاعي بسمها سر وجهار
تمشي البواخر بالبحور العظيمه = ماهمها طوف البحر حيث مادار
تكرم الحانا مانقول الشتيمه = ايضا ولانسمع بغيض وثرثار
ماطاف من وقتٍ نسينا حطيمه = وقلوبنا تشبه زلالٍ بالأنهار
يارب يامنشي من المزن غيمه = استر علينا من صواديف الاقدار
وانك تجنبنا الامور الوخيمه = وانك تجنبنا من الناس الاشرار