[سمّار]

صح لسانك يا مخاوي الذيب

كلماتك ساحره وقصيدتك فارهه وعلومك اكثر من غانمه

ابشر بالرد لكن اعتذر مسبقا عن عدم امكانية الوصول لمستوى قصيدتك هنا فقصيدتك قد اعتلت قمم الابداع وتحلت بتيجات الروعه

يامرحبا بالكتاب اللي علاماته=عشره على عشره ما فيها ولا غبني
ارسل به الشاعر اللي من معاناته=يقولّي الهم ماكلني وشاربني
حي الله الشعر والشاعر وكلْماته=مخاوي الذيب بابياته يكاتبني
وانا لعــينيـــه ما خالفت هقواته=عسفت مهر القصيد اللي ينادبني
الأولي: راقب الله واذكر آياته=واذا نويت أمرْ قول الله يراقبني
وان ضاق صدرك وقلبك زاد وناته=راجع حسابك وقول الله يحاسبني
والثاني: القلب لاتصغي لميلاته=درب الهوى مثل ما يجذبك جاذبني
ولو نوى القلب يوم يشنّ حملاته=لوادي العيب والا انّه يعايبني
لجمته لجام وادعس فوق راياته=يترب وفي درب ذِلّه ما يساحبني
يتوب عن حب قد لاعته كيّاته=الوجد حارق وفاس الشوق حاطبني
سلام ياصاحبي ما احلا سلاماته=الناس للناس وآجيبك وجاوبني