راع الهوا لامن سمع نبرة العود= تل الجوى قلبه ووجده عزف ناي
اليوم مابي عرق ما مرّه النود =نبضي ضريس سباع وعيوني عداي
تعصف بي الذكرى وتغني لها السود= وحشة غياب وذيب يعوي من اقصاي
في مرقبي مابي من المقبلة زود =خذيت ما يكفي عن الغايب الجاي
مار الهبايب كل ما حرّكت عود=صحّت وجود(ن) داخل الروح حكّاي
واسمع حسيس النار وآشم بارود= كبدي على صاجة ولا حس مركاي
يابو فهد لي عشرة سنين ٍ آرود=اصبح على نجران وامسي على ماي
والجوف عنها للعمل قمت مبعود=ليت الوزارة سكّرت قبل منفاي
واليوم في نجد العذيّة مع أسود=خلفة بني خالد هل الطيب ملجاي
فيضة بها نمسي ولا يمّها نعود=نجهم على الدلّة ونضحي على الشاي
شوف الربيع مطورخ وشوفة الذود=تانس خفوق اللي كره جلسة الهاي
لكن ليا هبّ الهوا واوقد رقود=دقّت جروس الشوق للجوف رجواي
رد الشيخ بدر بن فهد البليهد
ليا هنفت بالحاظ برموشها السود=وش تنتظر من عاشقه غير عزاي
مع ونة من حرها تهدم الطود=تهز بركان الضماير من اقصاي
راع الهوى لوصاح مافيه منقود=لكن منعت الحب عن بحثة خفاي
أي الذي يشكي ومشكاه موجود= أوالذي: موتي ولاحرف شكواي؟
أي الذي يصرخ لو العالم شهود= أو الذي: بالبسمة أستقبل عداي؟
أي الذي لاغاب ماهو بمفقود= أو الذي: لو راغ قالوا متى جاي؟
حملت امانة ورث شيبان وجدود= ما هي عرية حقي وملك يمناي
لا اخطيت من شرواك يا ماجد الجود= ماهمني من هو يسابق لمركاي
لاطاولك متسلق نافد الفود= اعرض، وما اسرع مايقع تايه الراي
لاشعرة حرك ولا كنه موجود= ولاحدني عفن السجاياعلى اقصاي