أعزائي رواد هذا المنتدى العريق أسعد الله أوقاتكم بالمسرات أحب أن اعتذر لكم عن هذا الإنقطاع بسبب بعض الضروف الخاصة وأطرح لكم هذه الابيات المتواضعه لعلها تنال شيء من استحسانكم :
القلب من قبلك للاحباب مرباع=كلن يحول به وينصب خيامه
مفتوح للآخر على كل مصراع=وأحبابنا مابين شده وقامه
هذا يجي في ساع ويروح في ساع=وهذا هنا مابين عامه وعامه
حتى دخلتي دخلةٍ بين الاضلاع=ماخلت النايم يكمّل منامه
بددتي أحباب الترف والتدلاع=وانساق لك قلبي من آخر هيامه
جيتي لقلبي مزنةٍ تحيي القاع=يحيى بها قلبٍ خطير إنصرامه
قلبٍ قبل لا يعرفك كان ملتاع=ومن الجفى ماباقي إلا حطامه
تسكن به الاتباع وتروح الاتباع=محدٍ بناه ولا تحقق مرامه
حتى سكنتي به سكن مابه نزاع=من يوم حبك لين يوم القيامه
ضمدتي القلب المحمّل بالاوجاع=يابلسم جروحه ومصدر غرامه
فيك ابتدى بالحب ياكل الإبداع=غمرك حبه واحتواك اهتمامه
ضايع بحبك لكن الحب ماضاع=يزيد يازاد الخفوق وطعامه
غلاك قسمني على أنصاف وأرباع=لو إني أرسى من رواسي تهامه
النفس تاقت والزمن مابعد طاع=ياعونة الله ياظبي العدامه
يحدني وقتي على إرضاه وانصاع=انصاع له والوقت مدري علامه
يمرر أطيافك وأنا إنسان طماع=أبغى لقاك ولا سمح لي نظامه