بسم الله الرحمن الرحيم
السلام عليكم ورحمة الله وبركاته
اقدم لكم هذه المتواضعة بعد طول الغياب..
بسم الله الرحمن ربّي وربّكم=ابدا جوابٍ محكماتٍ مثايله
وارهي من ادلالي على باغيَ القنَد=فنجالٍ (ا)بها الوقت قلّن مثايله
واقول من شيٍ وطاني بدنيتي=لوّي صغيرٍ مار هذي حصايله
من عاش بالدنيا.. من الغير يعتبر=واللا اعتبر به واحدٍ من عمايله
وكانك جهلت أنشد ترى العيب في الجهل=ومافيه مثل العلم ربحٍ لنايله
وحذراك من خطو المثرثر ونقلته=تصبح خشيرٍ له واذانك تشايله
إلى سمْع له علمٍ مع الناس .. يجمعه=ويخفي بعض مافيه ماهوب قايله
ويبّهر اللي باقيٍ ثم يطبخه=ويقلطْه لك لين تشكر سجايله
دامك وزاني فسمع الهرج من فمْي=وخلّ المبلس لاتوحّى هزايله
(من نمّ لك نم (ا)بك) .. لو كنت صاحبه=فراعِ الردى ليّاك تامن فعايله
واعرف ترى لك صاحبٍ مايجاملك=من بين ربعك لاتمايلت خايله
لا شاف عثراتك يعنّي لك القدم=هذا شويرك لاتدوّر بدايله
هو منوةٍ للي يدوّر على القدا=وعزّي لمن هو غادياتٍ رحايله
قلته وانا من ديرة جعلها الحيا =بتلى الوسم متقاضباتٍ مخايله
رزم الرعد فيهن يذرّف عيونهن=يدعي عبايرهن على الارض سايله
عشرين ليلة ماتوقّف عن البكا=لين ايتسابق دمعها في مسايله
تروى به ارضٍ باركٍ فوقها المحَل=وينبت بها من كل نبتٍ جلايله
هيَّ القصب جعْل اهلها ماتعوفها=يوم ان ولد اللّاش يجفى خلايله
وختامها صلّو على خاتم الرسل=نبيّنا اللي ماتعدد فضايله
جهاد بن عبدالعزيز بن عبدالله الشعلان