إن قلت لك تبت ، قلبي عنك ما تابي
ومن شان حبّك ، حشمت النّد وقدّرته
يهناك قلب ٍ بوسط الجـوف بك ذابي
نبضة غلاك ، بحشا صدري معطّرته
لاهجرس الفكر اعض ابهامي بنابي
وأدقّ صدري ،، لطاري ٍ بك ،، تذكًرته
فتحت لك باب ، تقديري ،، وإعجابي
وكل باب ٍ ،، بخاطري،، يزعلك سكّرته
شوقي ، لشوفك ، منوّخ عندك ركابي
شدّه،، حنين المشاعر ،، يوم ،، ظهّرته
وشوقك ، لشوفي يزاورني على بابي
والقلب ،، ياما ،، على لقياك ،، صبّرته
شوق ٍ عليه الحشا بالوجد منصابي
من جوره ،، الصدر شايل فوق مقدرته
كل من نشدني ، عن الحالة والأسبابي
حمدت ربي ،، وحبل ، الهرج ،، قصّرته
مخفيه ، من حاسد ٍ واشي ، ومغتابي
وعن ناقل الهرج ،، بين الناس ،، دثّرته
طيفك ، يجيني ، توالي اللّيل ، يرقابي
وأقول ،، هذا النعيم ،، اللّي ،، تصوّرته
ونعيش جوّ ٍ ولا ،، نحسب له احسابي
وفي نفسي أقول ،، صفو اللّيل ، كدّرته
إن كان ،، ظنّك ،، بحبّي ، يالغلا ، خابي
فظنّي ،، بحبّك حشى ، ما اقول ، غيّرته
شوفي دموع الوله ، منها الهدب شابي
وفي الصّدر ، ثاير لظى ، صبري تزّفرته
نعيت قلب ٍ ،، وجرحه ،، مابعد ،، طابي
من فرحته ، بك ،، توفّى ،، يوم ،، بشّرته
وكفّنت ،، أنا ..! جثّة ،، المغدور ،، بثيابي
وحطّيت لأجل الوفاء فى الجوف مقبرته
محمد بن عمار