[الطائر المهاجر]

..بصوت ألأموره



بصوت استبرق

بصوتي

قولوا لها الطيرالمهاجر ترى طار=ما عاد يطرى له من الحب طاري
وقولوا لها ما نيب من يقبل اعذار = المقفي اقفي عنه لو عشت ناري
ومن باعني بجنيه بعته بدينار= هذا انا ياجاهل في مساري
انت السبب يا حب في كل ما صار=وانت تحمّل قسوتي في قـراري
ما نيب من يخدع مثل بعض الاطيار= ولا نيب من ينصاد صيـد الحباري
طيرٍ صدوق ولو تحدّاه الاقدار= ما ينحني راسه لحصني وضاري
يا مدعي حبّي ترى الوقت دوّار= بانت الاعيبك على اللعب ضاري
اللي يحب اثنين لاشك غدار= واللي يحب أكثر فحبه تجاري
ويلك من الله عالمٍ كل الاسرار = باسباب لعبك عايشٍ في انكساري
يا ما حسبتك جنتي واثرك النار = ويا ما انخدعت العمر ما كنت داري
ياحيسفا عمرٍ قضيته بالاخطار=اتبع سراب وتايهٍ بالصحاري
كنت اعشقك واهواك في كل إصرار= وارفض جميع الناس لاجلك واداري
ازرع حروف اسمك بصدري كالازهار= تسقى بدمّ القلب تيار جاري
خليتني الغرقان تجرفه الانهار= وقدّام عينك اشتكي حرّ ناري
لله اشكي كل ظالم وجبّار= يحكم بعدله ياخذ بيوم ثاري
يا من خذا عمري وحلمي والافكار= ويا من حرق قلبي بغير اختياري
دوّر على غيري وادوّر للاخيّار= يمكن الاقي قلب للقلب شاري
يدري معاني الحب إخلاص وايثار= ويرد لي في الحب بعض اعتباري
فلا تنتظر مني ولا تحري اخبار= خلك بعيد ولا تجي في مداري
روّح مع النسيان ما احتاج تذكار=تكفي جروحك عن يمين ويساري